Myaso 64 - Livulu lya Shukulu Kalunga

Lilombelo lyakunyunga

Mwaso wa Ndaviti

¹ Tolilila ku lilombelo lyange yove Njambi, omwo njili mu tuyando. Njili na lyova lya vitozi vange, njamene!

² Njinyunge ku matumbe a vaka-vuvi, na ku vimunga vya vaka-kulinga vuvi.

³ Vindaka vyavo vinapu ngwe vimoko vya mbeli, majwi avo amavi anapu ngwe mikili ya vushungu.

⁴ Vashandola vwasi majwi a makuli a shwamwa, co vanyongesa vanu vavavwa na majwi a lyova akuvavangeya.

⁵ Valikundwila umo na mukwavo ku matumbe amavi, vasimutwiya vyakutsiya vanu mu vushweke co vendeka ngwavo, “Wai asa kutumona.”

⁶ Vatumba matumbe amavi, co vendeka ngwavo, “Tunatumbu vutumbe vwavuvwa vwakutsiilamo vanu.” Mbunge na mana a munu vyapwa vyakulova!

⁷ Oloni Njambi akavasha mikili, co vakavetwa.

⁸ Vakavanyongesa na majwi a mu tunwa twavo, co voshe vakavamona vakalipika ku mitwe yavo.

⁹ Voshe vakaziva lyova, co vakendeka ngwavo, “Kengeni vyanalingi Njambi, co vinyungeni mu vimbunge vyeni.”

¹⁰ Vanu voshe vaka-vushunga vakajolela omwo vije vyanalingi Shukulu Kalunga, co muli ikeye vakawana kwoloka, vanu voshe vakushungama mu vimbunge vakamushangazala.