Myaso 62 - Livulu lya Shukulu Kalunga

Kukulaela mukunyunga kwa Njambi

Mwaso wa Ndaviti

¹ Kukwesi kweka kwakutewela kuvanga kuli Njambi lika, kwamena kwange kutunda kuli ikeye.

² Ikeye lika muka-kunjinyunga nakunjamena, ikeye cimpaka cange, co naumo wai akanjifungulula.

³ Visimbu vingaijo yeni voshe mukalwa na munu wakuzeya? Uje napu ngwe civumbe cakusiwuka, nambe ngwe cimpaka cije cishaka kusiwuka?

⁴ Yeni mushaka lika kunjitundisa mu mwela wange wa kasingimiko, yeni muvwaelela mukwendeka makuli. Mulinakwendeka majwi a cizemo, oloni mu vimbunge vyeni muli cizindo.

⁵ Kukwesi kweka kwakutewela kuvanga kuli Njambi lika, omwo cinyangavili cange citunda kuli ikeye.

⁶ Ikeye lika muka-kunjinyunga nakunjamena, ikeye cimpaka cange, naumo wai akanjifungulula.

⁷ Kwovoka kwange na kasingimiko kange vyakala muli Njambi, ikeye limanya lyange lyakukola, muli Njambi mukemwo munjivanda.

⁸ Eni vasamba vange kulaeleni kuli Njambi simbu yoshe! Mulekeni vukalu vweni vwoshe, omwo ikeye muka-kutunyunga.

⁹ Vanu voshe vanapu ngwe muku, naumo wai napu wa seo. Kuvapeselesa voshe kuvesi na vulemu, vanapu vavehu ngwe muku.

¹⁰ Kesi mukulaele mu vyuma vya vupapoki, kesi mukulaele akuwana vyuma mu ngila ya vwizi embwe, nameme kukulaela mu vufuko vwavungi.

¹¹ Visimbu vyavingi njinazivi Njambi endeka ngwendi, “Nzili yakundama kuli yange,

¹² co njakala na cizemo cije kucesi kutenguluka.” Shukulu Kalunga, yove vavenya ukafwete munu na munu ngwe ku vipangi vyendi.