Myaso 61 - Livulu lya Shukulu Kalunga

Lilombelo lyakunyunga

Mwaso wa Ndaviti

¹ Ziva mutambi wange yove Njambi, co kumbulula lilombelo lyange!

² Kunjesi na cinyangavili, njitambeka kuli yove, oku njili ku lifuti lya kulyala. Unjitwale ku cimpaka cacivwa,

³ omwo yove wapwa vutewelo vwange, u cimpaka cange cakukola muje njasa kuvanda kuli vitozi vange.

⁴ Njitave njikale nove myaka yoshe, ngeci njiwane kwoloka mu mambava ove.

⁵ Yove Njambi wazivile vikulaeso vyange, co unanjivezikisa ngeci muje ukavezikisa vaje vakulemesa.

⁶ Wezelela myaka yaingi mukuyoya kwa mwene, ngeci ayoye simbu yoshe!

⁷ Ashwane myaka yoshe, amolika nove yove Njambi, munyunge na cizemo cove cije kucesi kutenguluka na kulongwa kwove.

⁸ Ngecivene, njikaimba nakushangazala lizina lyove simbu yoshe, co simbu yoshe njikanyunga vije njakulaesele.