Myaso 60 - Livulu lya Shukulu Kalunga

Lilombelo lyakupatula

Mwaso wa Ndaviti, omo walwile na Alame-nahalaime na Aleme-zova, co Yowave welukile nakutsiya vaEndome 12,000 mu Cimbongo ca Mwongwa (2 Sam 8:13; 1 Miz 18:12)

¹ Unatumbila kuti yove Njambi, ngeci vanatufungulula, unaluvala netu, oloni ololo tukwase.

² Yove waningangesele lifuti, unalitavula myanzi. Shoka myanzi yalyo, omwo lininganga manene!

³ Unayandesesa manene vanu vove, unatunwisa vwala vwakutupelyangesa.

⁴ Unanangula vaje vakukomoka, ngeci vatewe kesi vavanyongese.

⁵ Twamene na nzili yove, co kumbulula malombelo etu, ngeci vaje vanu vawazema vavamene.

⁶ Ku mwela wendi wakujela Njambi nendeka ngwendi, “Njikaangununa Shekeme, njikapangezela Cana ca Sukote kuli vanu vange omwo yange njili na nzili.

⁷ Ngilyande yapwa yange, na Manase lalo yapwa yange, Efalime yapwa ngwe tepa yange ya nzita, Yunda ikeyo yapwa mulamu wange wa vumwene.

⁸ Mowavi yapwa ngwe mbashiya yange yakujwelela, njikasha vin̄aku vyange a Endome. Kuma vaFilisitiya vayongola ngeci vakalisamba nakuvwaelela ali yange ndi?”

⁹ Iyajo akanjikovelesa mu nganda ije ili mu cimpaka, yove Njambi? Iyajo akanjitwamenena ku Endome?

¹⁰ Mwa vushunga vene kuma unatuvyana ndi? Kuma kuwasa kwenda amo na mashwalale vetu ndi?

¹¹ Tukwase kulwisa vitozi vetu, kukwasa kwa vanu kunapu kwangoco.

¹² Omwo tuli amo na Njambi tukahyana, ikeye akafungulula vitozi vetu.