Myaso 59 - Livulu lya Shukulu Kalunga

Lilombelo lyakunyunga

Mwaso wa Ndaviti, omo Saulu watumine vanu mukuvandamena ku njuvo ya Ndaviti ngeci vamutsiye (1 Sam 19:11)

¹ Njamene ku vitozi vange yove Njambi yange, njinyunge kuli vaje vanjilwisa!

² Njamene ku vanu vaka-vuvi, njamene kuli vaje vashaka kunjitsiya!

³ Kenga, vanu vaka-muuka vananjivandamena, vananjitengulukila ngeci vanjitsiye. Kesi ngwe njinalingi vuvi nambe cuma cimo ca kupenga-penga.

⁴ Yove Shukulu Kalunga, kukwesi mulonga unjinavavulumuna, vananjivandela nakunjivandamena ngeci vanjitsiye.

⁵ Ija unjikwase yove Shukulu Kalunga Njambi Muka-nzili yoshe. Yove Njambi wa Isalele! Hisa vaka-kujeneka kukukulaela, kesi uzivile ngozi vaka-kulinga vuvi na vitangwizi.

⁶ Vitozi vange vakeluka a simbu ya cingwezi, valinga muyoyo ngwe muvakolula tutali omo vaya nakwendangana mu nganda.

⁷ Tolilila kushaula kwavo nakujujwisa kwavo! Majwi a mu tunwa twavo anapu ngwe vimoko vya mukwale, vayongola ngeci naumo wai avaziva.

⁸ Oloni yove Shukulu Kalunga ukavajola, ukashendumuna vaka-kujeneka kukukulaela!

⁹ Yove nzili yange, njikenga kuli yove, omwo yove Njambi wapwa cimpaka cange.

¹⁰ Njambi yange mu cizemo cendi cije kucesi kutenguluka akaija kuli yange, Njambi yange akanjitavesa kumona vitozi vange omo vavafungulula.

¹¹ Kesi uvatsiye yove Njambi, nambe vanu vange kesi vevale kuhyana kwove. Yove Shukulu Kalunga cimpaka cetu! Vashandole na nzili yove nakuvafungulula.

¹² Vendeka vyavivi mu tunwa twavo, na majwi avo oshe anapu a vuvi, mu kulyalesa kwavo mukemwo vakavakwatela! Omwo valisinga nakwendeka makuli,

¹³ vanyongese na vukalu vwove, vanyongese voshe njwa. Asinoni vanu voshe vakazivuke ngeci Njambi ikeye muka-kushwana mu Isalele, kushwana kwendi kunete na ku shongo ya kaye koshe!

¹⁴ Vitozi vange vakeluka a simbu ya cingwezi, valinga muyoyo ngwe muvakolula tutali omo vaya nakwendangana mu nganda.

¹⁵ Vashakezeka vyakulya, co vonena nga kuvakutile.

¹⁶ A mutondo njikaimba a nzili yove, njikaimba nakutambeka a cizemo cove cije kucesi kutenguluka. Omwo yove wapwa cimpaka cange, cimpaka cange a litangwa lya tuyando.

¹⁷ Yove muka-kunjamena, njikaimba nakukushangazala, yove Njambi wapwa cimpaka cange, Njambi uje anjimwesa cizemo cije kucesi kutenguluka.