Myaso 58 - Livulu lya Shukulu Kalunga

Lilombelo lyakulomba kuli Njambi ahise vaka-vuvi

Mwaso wa Ndaviti

¹ Kuma yeni vaka-kushwana mukasompo mwa vushunga ndi? Kuma yeni mukasompo vanu voshe cifwa cimo ndi?

² Embwe, mukayongola lika a vuvi vuje vumukalingi, nakulinga milonga yakama ano asi.

³ Vaka-vuvi vapwa vaka-kuviisa simbu yoshe yakuyoya kwavo, vendeka makuli tunde a litangwa lya kusemuka kwavo.

⁴ Majwi avo ali na vushungu ngwe vushungu vwa manyoka, vanapu vanu vaje kuvatolilila kukuvanangula,

⁵ vaje kuvesi kuziva lijwi lya muka-kukokweya manyoka, nambe kuziva kwimba kwa muka-manseno wakunyanyama.

⁶ Yove Njambi, vitozi vange vali na vukalu ngwe vindumba. Pukula mayo avo nakupokola vimbange vyavo.

⁷ Vanyonge ngwe muwakomu mema, vavatsene ngwe muvakalyatangela mwila wa mu ngila,

⁸ vapwe ngwe sela ije isosonyoka kupwa mema-mema, vapwe ngwe mbututu wakupulumwisa uje kamono litangwa.

⁹ Mu vukalu vwendi Njambi akavapekumwina kulyala, oku vayoya, nakuvawisa simbu kanda vacizivuke, ngwe mwila wakukamba.

¹⁰ Vaka-vushunga vakavwaelela omo vakamona vaka-vuvi vavahisa. Mendi avo akajwela mu maninga a vaka-vuvi.

¹¹ Co vanu vakendeka ngwavo, “Vaka-vushunga vanatambula cikandelela cavo, mwa vushunga kwali Njambi muka-kusompa vaka-kaye!”