Myaso 57 - Livulu lya Shukulu Kalunga

Lilombelo lyakukwasa

Mwaso wa Ndaviti, omo watewele kuli Saulu mu linzenzengoma (1 Sam 22:1, 24:3)

¹ Njizivileko mema ku mbunge yove Njambi, omwo njiija kuli yove ngeci unjinyunge, ngwe mwakanyungu kazila vana vendi mu mambava, njitewela kuli yove, noo lihunzi lya mankimba akama linahu.

² Njitambeka kuli Njambi wa Akamwa ya Akamwa, uje muka-kunjana vyuma vyoshe vinjajena.

³ Akanjikumbulula nakunjamena oku ali mwilu, ikeye akafungulula vaka-kunjiyandesa. Njambi akanjimwesa cizemo cendi cije kucesi kutenguluka na kulongwa.

⁴ Njili mukati ka vitozi vakufwa ngwe vindumba. Mayo avo anafu ngwe makunga na mikili, kwendeka kwavo kuvavalesa ku mbunge ngwe mikwale yakuvambuka.

⁵ Mwesa vukama vwove mwilu ya melu yove Njambi, na vumpau vwove ano asi oshe!

⁶ Vitozi vange vananjitela linimbwa ngeci njitseo, tuyando tunatumu manene. Vanjiindilile mbulu mu ngila yange, oloni vawilililemo vakevo vavenya.

⁷ Mbunge yange inakolesa mbe yove Njambi, njikaimba nakukushangazala!

⁸ Njikenduka a mungulungengu, nakushangazala Shukulu Kalunga, na kalyalya kange na cisanzi cange!

⁹ Njikukandelela yove Shukulu Kalunga akati ka miyati, njikakushangazala akati ka vanu.

¹⁰ Cizemo cove cije kucesi kutenguluka cinete ku melu, na kulongwa kwove kunete ku mashelwa.

¹¹ Mwesa vukama vwove mwilu ya melu yove Njambi, na vumpau vwove ano asi oshe!