Myaso 56 - Livulu lya Shukulu Kalunga

Lilombelo lyakukulaela kuli Njambi

Mwaso wa Ndaviti, omo vaFilisitiya vamukwatele ku Ngate (1 Sam 21:13-15)

¹ Njizivileko mema ku mbunge yove Njambi, omwo vanu valinakunjilwisa, simbu yoshe vitozi vange valinakunjiyandesa.

² Vitozi valinakunjilwisa litangwa lyoshe lyamutunu. Vavangi valinakunjilwisa mu kulyalesa.

³ Yove Shukulu Kalunga Muka-nzili yoshe, nameme njili na lyova, oloni anga njikakukulaela kuli yove.

⁴ Njinakulaela kuli Njambi, co kunjizivi lyova, njimushangazala omwo a vije vyanakulaesa. Munu asa kunjilinga vikajo?

⁵ Vitozi vange vashaka kunjivulumuna litangwa lyoshe lyamutunu, visimbu vyoshe vanjitumbila vutumbe vwakunjivulumuna!

⁶ Valikungulwila ku mitambela ya mu vushweke, nakukengelela a vyuma vyoshe vinjilinga, co vayongola kunjitsiya.

⁷ Vahise omwo a vuvi vwavo yove Njambi, fungulula vanu na vukalu vwove!

⁸ Yove wazivuka muvali nakunjiyandesela, yove uzivuka vusiwa vwange. Kuma kuvaisonekele mu livulu ndi?

⁹ Litangwa lije njikatambeka kuli yove, vitozi vange vakeluka munima, omwo njazivuka ngeci Njambi ali amo nange!

¹⁰ Njishangazala vikulaeso vya Njambi, njishangazala lijwi lya Shukulu Kalunga.

¹¹ Njinakulaela kuli Njambi, co kunjikazivi lyova. Munu asa kunjilinga vikajo?

¹² Njikakwana vije vinjakukulaesele yove Njambi, njikakwana n̄ombelo yange ya cikandelela,

¹³ omwo unanjovola ku kutsa, co unanjamena kukunjifungulula. Ngecivene, njenda ku mesho a Njambi, mu ceke cije cilinakutwa ali vaka-kuyoya.