Myaso 55 - Livulu lya Shukulu Kalunga

Lilombelo lya munu uje uvanende vungungu kuli musamba wendi

Mwaso wa Ndaviti

¹ Ziva lilombelo lyange yove Njambi, kesi uvyane kulomba kwange!

² Njitolilile nakunjikumbulula, omwo njinazeye na cishota-mbunge.

³ Njilinakuziva lyova muvali nakunjishungwiya vitozi vange, vananjihyana omwo vaka-vuvi valinakunjiyandesa. Vanena tuyando ali yange, vanjiluvalela nakunjizinda.

⁴ Mbunge yange inashulu na lyova, co njinajujuka manene na lyova lya kutsa.

⁵ Njilinakujaja omwo lyova, co vukalu vwakama vunanjiwana.

⁶ Njalyendekesele ngwange, “Nga njakele na mambava ngwe katela, nga njapululwila kulyala ngeci njikawaneko kuhwima!

⁷ Nga njapululwila kulyala, nakukatungila njuvo yange mu mambo.

⁸ Nga njazambwilile mu cimpaka, kutewa lihunzi lya mankimba akama.”

⁹ Zimangana viyongola vya vitozi vange yove Shukulu Kalunga, tanganesa matumbe avo, omwo njinamono vunyengwe na vinzita mu nganda.

¹⁰ Mutanya na vutsiki vazenguluka vivumbe vyayo, co mukati kayo munashulu tuyando na n̄avava.

¹¹ Kwoshe-ikwoshe kuli kunyonga, mu vitapalo munashulu tuyando na makuli.

¹² Nga uje wanjishendumwine wapwile citozi, nga kunjombileko mbunge embwe, nga wapwile muka-kunjizinda uje walyalesele mukulwa nange, nga njavandele ngeci kesi anjimone.

¹³ Oloni yove wapwa u mukwetu, musamba wange wa a mbunge!

¹⁴ Twakele nakusimutwiya majwi amavwa amolika, co twakele nakulemesa amo na mbunga mu Njuvo ya Shukulu Kalunga.

¹⁵ Vitozi vange vatse vwasi omo kanda simbu yavo ya kutsa yete, vanapande kuya mu vukalo vwa vatsi oku vaciyoya! Nzili ya vuvi ikeyo ilinakuvapangesa.

¹⁶ Oloni njitambeka kuli Shukulu Kalunga Njambi ngeci anjikwase, co akanjamena.

¹⁷ Kulinyenga kwange nakukemanga kwange, vilinakweta kuli ikeye mutondo, na mutanya, na vutsiki, co ikeye aziva lijwi lyange.

¹⁸ Ikeye akanjiilwisa mwamuvwa ku nzita ije injilwa na vitozi vavangi manene.

¹⁹ Njambi, uje washwanene tunde ku san̄ulu, akanjiziva nakuvafungulula, omwo vanavyana kutenguluka, co lalo kuvesi nakumukomoka.

²⁰ Mukwetu wakulivanga walwisile vasamba vendi, co wapokwele cikumiiyo cendi.

²¹ Majwi endi apwile amavwa kutuvakana mavele akukonda, oloni mu mbunge yendi mwakele cizindo, majwi endi apwile amavwa kutuvakana mazi, oloni apwile akuvambuka ngwe vimoko vya mukwale.

²² Kundika tuyando twove kuli Shukulu Kalunga, co ikeye akakukwasa, ikeye kakatava muka-vushunga ngeci vamufungulule embwe.

²³ Oloni yove Njambi, ukombila kuti mapwepwe na vaka-makuli mu mbulu yakulova manene, kuvakayoyo kweta akati ka matangwa avo akuyoya embwe. Oloni yange njikakulaela kuli yove.