Myaso 51 - Livulu lya Shukulu Kalunga

Lilombelo lyakusambesa

Mwaso wa Ndaviti, omo Natane muka-kwimanena wendekele nendi a vupangala vwendi na Mbateshemba (2 Sam 12:1-15)

¹ Njizivileko mema ku mbunge yove Njambi, omwo a cizemo cove cije kucesi kutenguluka, omwo mema ku mbunge ove apwa akama, zimangana vivi vyange!

² Njijwelese ku vuvi vwange, na ku kupenga-penga kwange!

³ Omwo njizivuka milonga yange, co vuvi vuli ku mesho ange simbu yoshe.

⁴ Njinavulumuna kuli yove, kuli yove lika njinavulumuna, co njinalingi vyavivi ku mesho ove. Ngeci yove ushungamese omo unjisompa nakwendeka ngeci njili na mulonga.

⁵ Kenga, vanjikitilile mu vuvi, na mu vuvi mukemwo muvanjimitilile vanana.

⁶ Kukulaela na vushunga vikevyo viwashaka, njishulise na mana ove.

⁷ Tundisa vuvi vwange, co njikajela, njijwelese, co njikatoka too ngwe mema akukonda.

⁸ Njizivise muyoyo wakuvwaelela nakujolela, nameme unanjitsene nakunjipokozola, oloni njikavwaelela lalo.

⁹ Fwika mesho ove kesi ukenge ku vuvi vwange, zimangana vuvi vwange vwoshe.

¹⁰ Yove Njambi, tanga mbunge yakujela muli yange, co aka cizemo caciha cije kucesi kutenguluka muli yange.

¹¹ Kesi unjitundise ku mesho ove, co lalo kesi unjitundise munzinzime wove wakujela.

¹² Njivwaesele kujolela kwakwamena kwove, nakunjipwisa muka-kukwononoka.

¹³ Asinoni njikalongese vaka-kuvulumuna mashiko ove, ngeci vakatengulukile kuli yove. Yove Njambi muyoyesi wange.

¹⁴ Yove Njambi njamene ku mulonga wakutsiya, co njikavwaelela kwambulula vushunga vwove.

¹⁵ Njikwase kwendeka yove Shukulu Kalunga, co njikakushangazala.

¹⁶ Yove kuwashakele vin̄ombelo, nga njikakukombelelavyo, yove kuwesi kuvwaelela na vin̄ombelo vya kwenyeka.

¹⁷ Yove Njambi, n̄ombelo yange inapu munzinzime wa kulikeesa, kuwesi kuvyana mbunge ya kulikeesa na mbunge yakutenguluka.

¹⁸ Yove Njambi, zivila ngozi Siyone nakuyikwasa, co tungulula vivumbe vya Yelusalema.

¹⁹ Asinoni ukavwaelela na vin̄ombelo vyavivwa, na vin̄ombelo vyetu vya kwenyeka, co vakakombelela vingombe va nkomba a mutula wove.