Myaso 50 - Livulu lya Shukulu Kalunga

Kulemesa kwa vushunga

Mwaso wa Asafe

¹ Shukulu Kalunga Njambi Muka-nzili yoshe alinakwendeka, ikeye nasana kaye koshe, kutunda mu ngangela na mu kangombe ka yambi.

² Njambi alinakutwila ceke cendi mu Siyone, nganda ije yaivwa manene.

³ Njambi yetu aija, oloni kaija noloka kuluu embwe, tuhya twakunyongesa tuli kulutwe lwendi, na lihunzi lyakama linamuzengeleka.

⁴ Ikeye akasana lilu na asi kupwa vakaleo ngwe vanu ngeci vamone mwasompa vanu vendi.

⁵ Alinakwendeka ngwendi, “Njikungulwileni vanu vange vaka-kukulaela, vaje valikumiiye cikumiiyo nange akukombelela n̄ombelo.”

⁶ Melu asholola vushunga vwa Njambi, omwo Njambi vavenya wapwa lyaako!

⁷ “Tolilileni yeni vanu vange, co njikendeka, yove Isalele njikakwambulwila vukaleo. Yange Njambi njapwa nji Njambi yeni vene.

⁸ Kunjimiluvalesa omwo ya vin̄ombelo vyeni vya kwenyeka, vije mukanena kuli yange simbu yoshe.

⁹ Kunjitambula vingombe vyeni va nkomba nambe majamba eni a vimembe.

¹⁰ Omwo tusitu voshe vapwa vange, na vingombe vaje vali a malundu 1,000 vapwa vange.

¹¹ “Njizivuka tuzila voshe va ku minkinda na tusitu voshe va mu vyana vapwa vange.

¹² “Nga njakele na njala ngwe kunjamilombele vyakulya, omwo kaye na vyuma vyoshe vilimo vyapwa vyange.

¹³ Kuma njikali situ ya vingombe va nkomba, nambe kunwa maninga a vimembe ndi?

¹⁴ Kombeleleni kuli Njambi vin̄ombelo vyeni vya cikandelela, co aneni vije vimunalisingi kuli Muka-nzili yoshe.

¹⁵ Tambekeni kuli yange a litangwa lya tuyando, co njikamyamena, co mukanjishangazala.”

¹⁶ Oloni Njambi alinakwendeka kuli muka-vuvi ngwendi, “Omwo vikajo wambulwila vizilika vyange? Nambe kutumbula cikumiiyo cange na kanwa kove?

¹⁷ Omwo uzinda vilongesa vyange nakuvyana mashiko ange.

¹⁸ Yove ulikwata vusamba na mwizi woshe uje iwumona, co unalipandakana na vaka-vupangala.

¹⁹ “Ukapangesa kanwa kove kwendeka vya vuvi, co ndaka yove yendeka vya makuli.

²⁰ Yove uvangeya lika vandolome vove, nakuvatondela mulonga.

²¹ Vyuma vije vyoshe viwunalingi, yange njolokele kuluu, yove wayongwele ngeci yange njafwa ngwe yove. Oloni njikakwendekela nakukunungulwilavyo citona-mesho.

²² “Yeni vaka-kwivala Njambi tolilileni vyuma evi, kutewa njikaminyongesa, kukwesi weka lalo wakumyamena wai.

²³ Munu woshe akombelela n̄ombelo ya cikandelela anjisingimika. Co uje ashungamesa ngila yendi, njikamumwesa kwamena kwange.”