Myaso 49 - Livulu lya Shukulu Kalunga

Vukolokomba vwakukulaela vufuko

Mwaso wa cikota ca Kola

¹ Ziveni evi yeni vanu voshe! Yeni vanu voshe va mu kaye,

² Tolilileni yeni vanu vakama na ava vavandondo, vaka-kufuka na tuutu.

³ Viyongola vyange vakavizivisisa, co njikendeka majwi a mana.

⁴ Njikatolilila ku visimo, co njikanungulula muvinanungulukila omo njikaimba kalyalya.

⁵ Kunjesi na lyova a simbu ya vushonde, omo vitozi vaka-vuvi vananjizengeleka,

⁶ vaka-vuvi vaje vanakulaela vufuko vwavo, vali na kulyalesa a vufuko vwavo vwavungi.

⁷ Munu kasa kulikula ikeye vavenya, ikeye kasa kufweta Njambi ndando ya mwonyo wendi,

⁸ omwo ndando ya mwonyo wa munu yapwa yakama manene. Vije vyafweta kuvyasa kupwisamo,

⁹ ngeci ayoye myaka yoshe ano asi, co kakatsi embwe.

¹⁰ Munu woshe namono ngeci nameme vanu vakunyanyama vatsa, amolika na vikolokomba na vilema. Voshe valinakuseza vufuko vwavo ku vatekulwila vavo.

¹¹ Vimbumbo vyavo vikevyo membo avo a ku myaka yoshe, kuje kukekwo kuvakatumbama simbu yoshe, nameme laja vakele na lifuti lyavo.

¹² Vukama vwa munu kuvwasa kumuvindika kutsa, ikeye akatsa vene ngwe muvakatsi tusitu.

¹³ Kengeni vije vikalingiwa kuli vaje valikulaela vakevo vavenya, luvinda lwa vaje vakulaela vufuko vwavo,

¹⁴ vakevo vanavasompela kutsa ngwe vimanga, co kutsa kukekwo kukapwa kanyungi kavo. Vaka-vushunga vakashwana akamwa yavo, omo mivila yavo ilinakusosonyoka mu vukalo vwa vatsi kulyala na membo avo!

¹⁵ Oloni Njambi akanjamena, akanjamena ku nzili ya kutsa.

¹⁶ Kesi uzive lyova omo munu nafuku, omo vufuko vwendi vwatumu manene,

¹⁷ ikeye kasa kuvwambata omo atsa, vufuko vwendi kuvukai amo nendi mu mbumbo.

¹⁸ Nameme munu napwisamo nakuvwaelela mukuyoya kwa cifwa eci, nakumushangazala omwo alinakuya kulutwe,

¹⁹ ikeye akaliwana na vakukulwila vendi voshe ku vatsi, kuje kuli lisusulungu lya ku myaka yoshe.

²⁰ Vukama vwa munu kuvwasa kumuvindika kutsa, ikeye akatsa vene ngwe muvakatsi tusitu.