Myaso 48 - Livulu lya Shukulu Kalunga

Siyone nganda ya Njambi

Mwaso wa cikota ca Kola

¹ Shukulu Kalunga ikeye wakama, vanapande kumushangazala manene, mu nganda ya Njambi yetu, a lilundu lyendi lyakujela.

² Siyone munkinda wa Njambi, ukewo uli kulyala ku kunto, co lalo wauvwa, nganda ya mwene wakama inena kujolela mu kaye mwoshe!

³ Njambi namwesa ngeci, kuje kwali kuli kwoloka.

⁴ Vimyene valikungulwile amolika, mukulwisa Munkinda wa Siyone.

⁵ Oloni omo vaumwene, co valikomokelele manene, vakele na lyova vatewele.

⁶ Lyova lyavakolele nakukemanga, ngwe munakazi akita mwana.

⁷ Ngwe lihunzi lya mu ngangela litavozola mato akama a ku Tashishi.

⁸ Tunazivi vije vyalingile Njambi, co ololo tunavimono mu nganda ya Njambi yetu, Shukulu Kalunga Muka-nzili yoshe, ikeye akanyunga mwamuvwa nganda ku myaka yoshe.

⁹ Tuyongola cizemo cove cije kucesi kutenguluka yove Njambi, mukati ka Njuvo yove.

¹⁰ Vanu valinakukushangazala kwoshe-ikwoshe, co lutsimo lwove lunashandokela ano asi oshe. Yove washwana mu vushunga.

¹¹ Munkinda wa Siyone ujolele! Vana va vanakazi va ku Yunda vavwaelele, omwo kusompa kwove kwapwa kwa vushunga!

¹² Vanu va Njambi zengulukeni Munkinda wa Siyone co laveni tuposhi twawo,

¹³ kengeni mwamuvwa vivumbe vyayo, co iluleni mwamuvwa vimpaka, ngeci mukase kuleka cisemwa ca kulutwe ngweni,

¹⁴ “Ou Njambi wapwa Njambi yetu ku myaka yoshe, akatutwamenena ku visimbu vyoshe.”