Myaso 44 - Livulu lya Shukulu Kalunga

Lilombelo lyakunyunga

Mwaso wa cikota ca Kola

¹ Yove Njambi, tunazivi laja na matwi etu, vakukulwila vetu vatulekele laja, vyuma vyakama vije viwalingile a simbu yavo, ku matangwa a ku san̄ulu.

² Yove washekelemo vaka-kujeneka kukulaela kuli yove Shukulu Kalunga, co waakele vanu vove mu lifuti lyavo, yove wahisile miyati ikwavo lalo, co wakongweyeye vove.

³ Vanu vove kuvafungulwile lifuti lije na mikwale yavo embwe, nambe kushwana lifuti mu nzili yavo embwe, oloni eyi yapwile nzili yove na moko yove, a lizivasano lyove, nakuvamwesa ngeci yove wavazema.

⁴ Yove unapu u mwene yange na Njambi yange, yove ukahyanesa vanu vove.

⁵ Mu nzili yove tukafungulwila asi vitozi vetu. Mu lizina lyove tukalyatangela vaka-kutulwisa.

⁶ Omwo kunjikakulaela vuta vwange vwa lusipa, nambe mukwale wange kuwasa kunjamena,

⁷ oloni unatwamena ku vitozi vetu, co yove unazivisa shwamwa vaka-kutuzinda.

⁸ Simbu yoshe tukalyalesela muli yove, co tukakandelela lizina lyove ku myaka yoshe.

⁹ Oloni ololo unatuvyana nakutwecelela ku vitozi vetu ngeci vatufungulule, co kuwesi nakwenda lalo amo na mashwalale vetu.

¹⁰ Yove watavele ngeci tutewe ku vitozi vetu, co vapukwile vyuma vyetu.

¹¹ Yove watavele ngeci vatutsiye ngwe vimanga, co watushandwelele ku mafuti eka.

¹² Yove walandesele vanu vove ngwe vindungo na ndando yaindondo, co kuwawaneneo nganyo.

¹³ Vandambo vetu vamwene vije viwalingile kuli yetu, co vatushendumwine nakutujola.

¹⁴ Unatupwisa cuma cakushauka akati ka miyati, valinakulipika ku mitwe yavo omwo yetu, nakutushendumuna.

¹⁵ Simbu yoshe njilinakushauka, co njilinakuziva shwamwa manene,

¹⁶ ku majwi akuyeluwisa naa akushaula aje vendeka vitozi vange na vaje vanjizinda.

¹⁷ Vyuma vyoshe vije vyalingiwile kuli yetu, nameme yetu kutwakwivalele, nambe kupokola cikumiiyo cije walikumiiye netu.

¹⁸ Kutwapwile vaka-kujeneka kulongwa kuli yove, co kutwapwile vaka-kujeneka kwononoka mashiko ove.

¹⁹ Oloni yove unatwecelela ngoco mukati ka tusitu, co unatumbila mu lisusulungu vwii.

²⁰ Nga twalikelele kulemesa Njambi yetu, nakulombela kuli njambi weka,

²¹ mwa vushunga ngwe kuwavisholwele ndi? Omwo yove uzivuka viyongola vyakushweka vya mu vimbunge.

²² Oloni omwo ali yove mukemwo valinakututsiya simbu yoshe, valinakutupwisa ngwe vimanga vaje valinakuya nakuvatsiya.

²³ Induka yove Shukulu Kalunga, omwo vikajo unalalela? Induka! Kesi utumbile kuti myaka yoshe!

²⁴ Vikajo unatukengesela nima? Kesi wivale tuyando na mapakeso etu!

²⁵ Vatusindakanena asi vanatufungulula, nakumbashamena asi.

²⁶ Katuka utukwase! Twamene, omwo cizemo cove cije kucesi kutenguluka!