Myaso 42 - Livulu lya Shukulu Kalunga

LIVULU LYAMUCIVALI (Mya 42–72) Lilombelo lya munu wa mu vunzinda

Mwaso wa cikota ca Kola

¹ Ngwe nava ashungwiya manene vana va vindonga vya mema akutonola, nange lalo njishungwiya yove, Njambi yange.

² Njishungwiya Njambi, ngwe ciyambi ashungwiya mema, simbu mukajo njikamona cihanga ca Njambi?

³ Mutanya na vutsiki njilinakulila, tuyando nakukemanga vinapu ngwe vyakulya vyange, visimbu vyoshe vitozi vange vanjishendumuna ngwavo, “Njambi yove ali kulijo?”

⁴ Mbunge yange ipokoka omo njanuka vya kunima, omo njaile na mbunga ya vanu ku Njuvo ya Shukulu Kalunga, co njavatwamenenene omo vakele nakunjikava munima, yapwile mbunga yakuvwaelela, vembile nakutambeka nakushangazala Njambi.

⁵ Omwo vikajo njinaviilila? Mbunge yange vikajo inazeyela? Omwo vikajo njilinakulinyengela? Njikaka cinyangavili cange muli Njambi, co njikamushangazala lalo, muyoyesi wange, na Njambi yange.

⁶ Yove Njambi yange, mbunge yange inapokoka muno mu vunzinda, ngecivene, njikundika viyongola vyange kuli yove,

⁷ yove unaka vusiwa mukuyoya kwange ngwe mankimba, vitanga vilinakwija kuli yange ngwe livazi, vinapu ngwe cipupa cikuma ku Ndonga ya Yondau, ku Munkinda wa Helemone na ku Munkinda wa Mizale.

⁸ Shukulu Kalunga amwese cizemo cendi cije kucesi kutenguluka ku mutanya, co njimwimbila mwaso ku vutsiki, kupwa lilombelo lya kuli Njambi yange wa mwonyo.

⁹ Njikendeka kuli Njambi uje wapwa cimpaka cange ngwange, “Omwo vikajo unanjivalela? Omwo vikajo njilinakuyandela ku muuka wa vitozi vange?”

¹⁰ Muvila wange unavupuka na kashaundu kavo, omo valinakunjihozola ngwavo “Njambi yove ali kulijo?”

¹¹ Omwo vikajo njinaviilila? Omwo vikajo njilinakulinyengela? Njikaka cinyangavili cange muli Njambi, co njikamushangazala lalo, muyoyesi wange na Njambi yange.