Myaso 41 - Livulu lya Shukulu Kalunga

Lilombelo lya munu wa kuvinja

Mwaso wa Ndaviti

¹ Navezika munu uje ayongola ali vaka-kuzeya, Shukulu Kalunga akamukwasa a litangwa lya tuyando.

² Shukulu Kalunga akamunyunga nakumuyoyesa, co akavezika mu lifuti, kakamuseze ku mavoko a vitozi vendi.

³ Shukulu Kalunga akamukwasa omo avinja, co akamutakamesa nakumukangwisa.

⁴ Njendekele ngwange, “Njizivileko mema ku mbunge yove Shukulu Kalunga, njikangwise omo njinavulumuna kuli yove!”

⁵ Vitozi vange valinakwendeka vyuma vyavivi ali yange, vendeka ngwavo, “Mwaka ukajo akatsa ngeci lizina lyendi linyonge?”

⁶ Vaje vaija nakunjimona vanapu vaka-civembulu, vambulula muzimbu wauvi ali yange, co vaya nakuwambulula kwoshe-ikwoshe.

⁷ Voshe vaje vanjizinda vaya nakunjifweya ku umo na mukwavo, nakunjitumbila matumbe akunjivulumuna.

⁸ Vendeka ngwavo, “Mushongo wendi umutwala ku kutsa, co kakenduka lalo a vulili vwendi.”

⁹ Nameme musamba wange vene wa a mbunge, uje njakulaelele manene, nanjitengulukila nakunjilwisa.

¹⁰ Oloni yove Shukulu Kalunga, njizivileko mema ku mbunge nakunjikangwisa, ngeci njikavelwisile vuvwa ku vuvi.

¹¹ Omwo a cuma eci njizivuka ngeci yove uvwaelela nange, omwo vitozi vange kuvanjifungulula.

¹² Yove ukanjikwasa, omwo njikalingi vya vushunga, co njikatumbama ku mesho ove ku myaka yoshe.

¹³ Wakushangazala Shukulu Kalunga Njambi ya Isalele, mushangazaleni lelo na ku myaka yoshe! Ewa! Ewa!