Myaso 40 - Livulu lya Shukulu Kalunga

Mwaso wakushangazala

Mwaso wa Ndaviti

¹ Njavandamenene Shukulu Kalunga nakusimpa ngeci anjikwase, asinoni wazivile mutambi wange.

² Ikeye wanjitundisile mu mbulu ya vushonde, mu lindova lya vutome! Wemikile mendi ange a limanya, nakunjinyunga mwamuvwa.

³ Wanjilongesele kwimba mwaso wauha, mwaso wakushangazala Njambi yetu. Vavangi vakamona eci, co vakaziva lyova, co vakakulaela kuli Shukulu Kalunga.

⁴ Navezika munu uje akulaela kuli Shukulu Kalunga, munu uje kesi kutengulukila ku tumponya, nambe kulipandakana na vanu vaje vaka-kulemesa vinjambi va makuli.

⁵ Unatulingila vyuma vyavingi yove Shukulu Kalunga Njambi yetu, kukwesi weka lalo wakufwa ngwe yove! Yove unatulingila matumbe amangi akukomokesa, aje kunjasa kuwatumbula oshe, anapu amangi manene.

⁶ Yove kuushaka kukukombelela vin̄ombelo, yove kuwesi kulomba tusitu twamutunu twa kwenyeka a mutula, nambe vin̄ombelo vya a vuvi. Oloni unanjana matwi akukuziva,

⁷ co njakumbulwile ngwange, “Yange uno, kulikundika kwange kuli yove vanacisoneka mu livulu lyove.

⁸ Njambi yange njizema kulinga cizango cove, njikanyunga vilongesa vyove mu mbunge yange.”

⁹ Mu cikungulukilo cakama ca vanu vove voshe yove Shukulu Kalunga, njambulwile vin̄anda vyavivwa vyakutwamena. Yove uzivuka ngeci kunjikalikela kuvyambulula.

¹⁰ Yange kunjashwekele mu mbunge yange vin̄anda vyavivwa vyakwamena embwe, oloni visimbu vyoshe njinambulula vushunga vwove nakwamena kwove. Mu vikungulukilo vya vanu vove voshe kunjolokele ngoco kuluu ngwe kaveveve, oloni njinambulula kulongwa kwove na cizemo cove cije kucesi kutenguluka.

¹¹ Shukulu Kalunga njazivuka kuukalikela kunjizivilako mema ku mbunge! Cizemo cove cije kucesi kutenguluka na kulongwa kwove vikanjinyunga simbu yoshe.

Lilombelo lyakukwasa

¹² Tuyando twatungi tunanjizengeleka kunjasa kutulava! Vivi vyange vinanjikakateya mbe, kunjasa kumona lalo embwe, vivi vyange vinatumu manene kutuvakana vin̄ambu vya ku mutwe wange, co mbunge yange inazeye.

¹³ Yove Shukulu Kalunga, njamene, yove Shukulu Kalunga, zambula ngeci unjikwase!

¹⁴ Shwamwa ivakole vaje vashakezeka mwonyo wange ngeci vaunyongese, ilwisa vuseta-nima nakuzivisa shwamwa, vaje vavwaelela omwo tuyando twange!

¹⁵ Voshe vaje vanjishendumuna, nakwendeka nange ngwavo, “Mbwatu,” vazive shwamwa nakulikomokela.

¹⁶ Voshe vaje vaija kuli yove, vavwaelele nakujolela! Voshe vaje vazema kwamena kwove, simbu yoshe vendeke ngwavo, “Shukulu Kalunga wapwa wakama!”

¹⁷ Shukulu Kalunga yange njapwa njiwakuzeya na kuutwa, oloni kuwanjivalele. Yove wapwa muyoyesi wange na Njambi yange, kesi wishwale mukunjamena.