Myaso 39 - Livulu lya Shukulu Kalunga

Kulitavela kwa munu wakuyanda

Mwaso wa Ndaviti

¹ Njendekele ngwange, “Njikanyunga vingila vyange, co kunjikatavesa ndaka yange injilingise vuvi, kunjikendeka cuma cimo omo vaka-vuvi vali muyehi.”

² Njolokele kuluu, kunjendekele lijwi limo, nameme kwendeka a cuma cimo cacivwa! Oloni nameme ngoco tuyando twange twatumine manene,

³ mu mbunge yange mwashalukile shaluu, co viyongola vyange vyashwamene ngwe tuhya, asinoni njendekele ngwange,

⁴ “Shukulu Kalunga myaka ingaijo njikayoya? Simbu ikajo njikatsa? Njileke awukahwila mwonyo wange.”

⁵ Mwonyo wange unawuseteka na vikajo? Ku mesho ove simbu yakuyoya kwange inapu yangoco. Mwa vushunga vene mwonyo wa munu woshe wakuyoya ano asi unapu ngwe lihunzi,

⁶ unapu wangoco ngwe munzinze, vyoshe vije vyalinga munu vinapu vyangoco, ikeye akakungulula vufuko oloni kazivuka ngeci vukapwa vweyajo!

⁷ Ngecivene, Shukulu Kalunga vikajo vinjikengelela? Njaka cinyangavili cange muli yove.

⁸ Njamene ku milonga yange yoshe, co kesi utave vilema vanjishendumune.

⁹ Njikoloka kuluu ngwe kaveveve, kunjikendeka lijwi nalimo lyai, omwo yove unanjimwesa tuyando twangacije.

¹⁰ Kesi unjihise lalo! Njili kuyehi na kutsa na n̄ome yove!

¹¹ Yove ukahisi vuvi vwa munu akumwendekela, co ukanyongesa vufuko vwendi ngwe mwakavunyongesa kanembulu. Mwa vushunga munu napu wangoco ngwe lihunzi!

¹² Shukulu Kalunga tolilila lilombelo lyange, co tolilila ku mutambi wange, kesi woloke omo njitambeka kuli yove! Yange nji mungenzi, nji muka-kwija ngwe muvapwile vakukulwila vange voshe.

¹³ Acinjiseze tai njicivwaelele, simbu kanda njitse nakuya ku vukalo vwa vatsi.