Myaso 38 - Livulu lya Shukulu Kalunga

Lilombelo lya munu wakuyanda

Mwaso wa Ndaviti, mbimbi

¹ Nambe unaluvala yove Shukulu Kalunga, oloni kesi unjinyanyamese!

² Vukalu vwove vunaija ali yange ngwe mikili, livoko lyove linanjisindakana.

³ Njilinakuvinja omwo vukalu vwove, co muvila wange woshe uli na mushongo omwo vuvi vwange.

⁴ Omwo vuvi vwange vunanjihyana, cihiso cange cinanjihyana kutuvakana nzili yange.

⁵ Vimbandu vyange vyavolo vilinakunika, omwo vulema vwange.

⁶ Njakulama mwongo wange, njenda nakulila litangwa lyoshe.

⁷ Nyonga yange ishaluka shaluu ngwe tuhya. Njilinakuvinja.

⁸ Yange njinapokoka nakuzeya, omwo mbunge yange ilinakulishoshomwena, co njilila nakukemanga.

⁹ Yove Shukulu Kalunga uzivuka vije vinjishaka, yove unazivi kukemanga kwange kwoshe.

¹⁰ Mbunge yange ilinakulwa manene, co nzili yange inahu, mesho ange anatsitsivala kuwesi nakumona mwamuvwa.

¹¹ Vasamba vange na vandambo vange kuvesi nakunjishwenya muyehi, omwo vimbandu vyange, nameme vene naanga yange kuvesi nakunjishwenya muyehi.

¹² Vaje vashaka kunjitsiya vananjitela myeto kulutwe lwange, vaje vashaka kunjivulumuna vashungwiya kunjinyongesa, co litangwa lyoshe vatumba vutumbe vwakunjilwisa.

¹³ Oloni yange njinafu ngwe kasinda-matwi, uje kesi kuziva, co lalo njinafu ngwe munu wa kalaka, uje kesi kwendeka.

¹⁴ Njinapu ngwe kaveveve uje kesi kuziva, co kasa kukumbulula.

¹⁵ Oloni njinakulaela kuli yove Shukulu Kalunga, co yove Shukulu Kalunga Njambi yange ukanjikumbulula.

¹⁶ Kesi utave vitozi vange valishashele a tuyando twange, kesi utave valyalese omo njinau asi!

¹⁷ Ngecivene, njishaka kuwa, co tuyando twange kutunjitundu.

¹⁸ Njilitavela vuvi vwange, vukevwo vulinakunjizivisa shwamwa.

¹⁹ Vitozi vange vakolesa, vali na nzili, co vavangi vananjizindi kujeneka mulonga.

²⁰ Vaje vapwisa vyavivwa kupwa vyavivi, vanapu vaka-n̄ole yange omwo njikalingi vushunga.

²¹ Kesi unjiseze yove Shukulu Kalunga, yove Njambi yange kesi ukale kulyala nange!

²² Yove Shukulu Kalunga muyoyesi wange, zambula unjikwase!