Myaso 37 - Livulu lya Shukulu Kalunga

Vije vikasholoka ali muka-vuvi na muka-vuvwa

Mwaso wa Ndaviti

¹ Kesi ulishoshomwene ali vaka-kulinga vuvi, nambe kuliveyela vaje valinga vya kupenga-penga.

² Vakevo vakahwa ngwe mwila wakuma, vakajujwama ngwe maputa akutonola.

³ Kulaela kuli Shukulu Kalunga, co linga mwamuvwa, kala mu lifuti, co yoya mwamuvwa.

⁴ Vwaelela muli Shukulu Kalunga, co akakwana vije viwushaka.

⁵ Kundika ngila yove kuli Shukulu Kalunga, kulaela kuli ikeye, co akakukwasa,

⁶ akavyazimisa vushunga vwove ngwe litanya lya akati ka mutwe.

⁷ Simpa nakuvandamena Shukulu Kalunga ngeci apange, kesi ushote mbunge ali vaje vanafuku, nambe vaje valinakuya kulutwe a matumbe avo a vuvi.

⁸ Kesi ushote mbunge nambe kuluvala! Citwala lika ku tuyando.

⁹ Vaje vakulaela kuli Shukulu Kalunga, vakashwana mu lifuti, oloni vaka-vuvi vakavashekela anja.

¹⁰ Mu kasimbu kakandondo lika, vaka-vuvi vakahwa voshe njwa, ukavashakezeka, oloni kuukavawana.

¹¹ Vaka-kulikeesa vakashwana mu lifuti, co vakajolela nakukala mu kwoloka.

¹² Muka-vuvi atumbila vutumbe muka-vushunga, co amukenga na vukalu.

¹³ Oloni Shukulu Kalunga akajolo vaka-vuvi, omwo nazivuka ngeci kasimbu kakandondo lika vakanyonga.

¹⁴ Vaka-vuvi vashomona mikwale yavo, co vanana mata avo a lusipa, nakutsiya kautu na muka-kujeneka, nakutsiya vaje valinga vyavivwa,

¹⁵ oloni vakatsa ku mikwale yavo vavenya, co mata avo a lusipa akapokozoka.

¹⁶ Cuma cacindondo calinaco muka-vushunga cinatuvakana vufuko vwoshe vwa vaka-vuvi.

¹⁷ Shukulu Kalunga akatundisa nzili ya vaka-vuvi, oloni akanyunga vaje vanapu vavavwa.

¹⁸ Shukulu Kalunga akanyungu vaje vamwononoka, co lifuti likapwa lyavo ku myaka yoshe.

¹⁹ Vakevo kuvakayanda a simbu ya vukalu, co vakakala na vyakulya vyavingi a simbu ya njala ya lyangengela.

²⁰ Oloni vaka-vuvi vakanyonga, co lalo vitozi va Shukulu Kalunga vakaziluka ngwe vishani, vakahwa ngwe vwisi, co kuvakavamono lalo embwe.

²¹ Munu muka-vuvi akakumuna, oloni kesi kwilwisa, oloni munu wamuvwa wakala na ngozi nakwana vwana vwendi.

²² Vaje vanavezikisa Shukulu Kalunga vakashwana mu lifuti, oloni vaje vanasingi akavashekela anja.

²³ Shukulu Kalunga akatwamenena munu mu ngila ije yanapande kwendelamo, co akanyungu vaje vamuvwasa.

²⁴ Nga vawa, kakavecelela vakale asi embwe, omwo Shukulu Kalunga akavakwata na livoko lyendi.

²⁵ Njapwile nji mukwenje, ololo njinakuluvala, kanda njimone Shukulu Kalunga kwivala muka-vushunga, nambe vana vendi kulomba vyakulya.

²⁶ Visimbu vyoshe akana vwana nakukumwisa ku vakwavo, co vana vendi vavezika.

²⁷ Tundeni ku vuvi ngeci mulinge vushunga, co vatekulwila veni vakayoya mu lifuti myaka yoshe.

²⁸ Omwo Shukulu Kalunga wazema vije vyavivwa, ikeye kesi kuseza vanu vendi vaje vamukulaela, co ikeye akavanyunga simbu yoshe, oloni vatekulwila va vaka-vuvi vakavashekela anja.

²⁹ Vaka-vushunga vakakala mu lifuti, co vakayoyelamo ku myaka yoshe.

³⁰ Majwi a munu wamuvwa apwa a mana, co ikeye akendeka vushunga simbu yoshe.

³¹ Ikeye akanyungu lishiko lya Njambi yendi mu mbunge yendi, co kesi kuliseza.

³² Munu muka-vuvi simbu yoshe akakenge ali munu wamuvwa nakushaka kumutsiya,

³³ oloni Shukulu Kalunga kakamwecelela ku mavoko a vitozi vendi, nambe kutava ngeci vamuhise omo vamusompesa.

³⁴ Aka cinyangavili cove muli Shukulu Kalunga ononoka mashiko endi, akakusingimika nakukwana lifuti, co ukamona vaka-vuvi vavashekamo.

³⁵ Njamwene muka-vuvi uje wakele na vukalu, ikeye wahyanene munu woshe ngwe muti wa kendale wa ku Lembanone.

³⁶ Oloni omo njetile kuje kunjamuwaneneko, njamukengezekele, oloni kunjamuwanene.

³⁷ Kenga ali muka- mulonga, na ali muka-vushunga, munu wa kwoloka wakala na vatekulwila vavangi,

³⁸ oloni vaka-vuvi vakavanyongesa voshe njwa, na vatekulwila vavo vakavanyongesa.

³⁹ Kwamena kwa vaka-vushunga kutunda kuli Shukulu Kalunga. Ikeye vutewelo vwavo a simbu ya tuyando.

⁴⁰ Shukulu Kalunga avakwasa nakuvamena, ikeye avamena ku vaka-vuvi, omwo vatewela kuli ikeye ngeci avanyunge.