Myaso 34 - Livulu lya Shukulu Kalunga

Kushangazala vuvwa vwa Njambi

Mwaso wa Ndaviti, omo walikwisile kuzaluka kuli Avimeleke uje wamushekele, co waile (1 Sam 21:13-15)

¹ Simbu yoshe njikakandelela Shukulu Kalunga, kunjikalikela kumushangazala.

² Njikamushangazala a vije vyanalingi, voshe vaje vaka-kulikeesa vazive nakujolela!

³ Tsimaneseni vukama vwa Shukulu Kalunga amo nange, tushangazaleni lizina lyendi!

⁴ Njalombelele kuli Shukulu Kalunga, co wanjikumbulwile, ikeye wanjipatwile ku lyova lyange lyoshe.

⁵ Vaka-kuyanda vakenga kuli ikeye, co vajolela, kuvakazivi shwamwa.

⁶ Tuutu vakatambeka kuli ikeye, co akavaziva, ikeye akavamena ku tuyando twavo twoshe.

⁷ Kangelo ka Shukulu Kalunga akanyungu vaje vakomoka Shukulu Kalunga, nakuvapatula ku vushonde.

⁸ Kengeni mumone ngeci Shukulu Kalunga wapwa wamuvwa! Navezika munu uje atewela muli ikeye.

⁹ Yeni vanu vendi vakujela komokeni Shukulu Kalunga, vaje vamukomoka kuvakajeneka cuma nacimo cai.

¹⁰ Vana va vindumba vajeneka vyakulya, co vaziva njala, oloni vaje valemesa Shukulu Kalunga kuvakajeneka cuma cacivwa nacimo cai.

¹¹ Ijeni vana vange, njitolilileni, co njikamilongesa kukomoka Shukulu Kalunga.

¹² Munu iyajo uje ashaka mwonyo? Munu uje ashaka kuyoya matangwa amangi ngeci amone vyavivwa?

¹³ Munu wa cifwa cangacije kesi endeke vyavivi nambe kwendeka makuli.

¹⁴ Atunde ku vuvi nakulinga vyuma vyavivwa, ashakezeke nakukavangeya kwoloka.

¹⁵ Shukulu Kalunga akenga ali vaka-vushunga, co aziva mutambi wavo,

¹⁶ oloni ikeye akayeluwisa vaje vaka-kulinga vuvi, co vavevala vwasi omo vatsa.

¹⁷ Omo vaka-vushunga vatambeka, co Shukulu Kalunga avaziva, avamena ku tuyando twavo twoshe.

¹⁸ Shukulu Kalunga ali muyehi na vaje vanazeye mu vimbunge, ikeye amena vaje vanajeneka cinyangavili.

¹⁹ Tuyando twa muka-vushunga twapwa twatungi, oloni Shukulu Kalunga amwamena mu vyoshe.

²⁰ Shukulu Kalunga anyunga vitsiya vyendi vyoshe, nacimo cai cipokokako.

²¹ Vuvi vuvulumuna vaje vaka-kuvulinga. Voshe vaje vazinda vaka-vushunga vakavahisa.

²² Shukulu Kalunga amena myonyo ya vangamba vendi, naumo wai atewela muli ikeye vakamuhise.