Myaso 33 - Livulu lya Shukulu Kalunga

Mwaso wakushangazala

¹ Yeni voshe vaka-vushunga tambekeni nakujolela, omwo vije vyanalingi Shukulu Kalunga, Yeni voshe vaka-kumwononoka mushangazaleni.

² Shangazaleni Shukulu Kalunga na tulyalya, mwimbileni na kalyalya ka mikole likumi.

³ Mwimbileni mwaso wauha, imbeni kalyalya na vutongwe, nakutambeka nakujolela!

⁴ Majwi a Shukulu Kalunga apwa a vushunga, na vipangi vyendi vyoshe vyapwa vya vushunga.

⁵ Shukulu Kalunga azema vushunga na vuvwa, asi anashulu na cizemo cendi cije kucesi kutenguluka.

⁶ Akushika kwendi Shukulu Kalunga watangele lilu, co na lijwi lyendi kwasholokele litangwa, na ngonde, na vingongonosi.

⁷ Ikeye wakungulwile mema kumolika, co washokele vinzinga vya mema mu mutambela umolika.

⁸ Yeni voshe vaka-asi komokeni Shukulu Kalunga! Musingimikeni, yeni voshe vanu va ano asi!

⁹ Omwo ikeye wendekele lika na lijwi. Co vyuma vyoshe vyalingiwile, ikeye washikile, co vyuma vyoshe vavitangele.

¹⁰ Shukulu Kalunga anyongesa mana a vanu, ikeye atanganesa matumbe a vanu kuwapwisa angoco.

¹¹ Oloni mana a Shukulu Kalunga akala ku myaka yoshe, viyongola vya mu mbunge yendi vyakala ku myaka yoshe.

¹² Wavezika vanu vaje Njambi ikeye napu Shukulu Kalunga kavo, vavezika vanu vaje vanaangula Njambi ngeci vapwe vushwana vwendi!

¹³ Shukulu Kalunga akenga asi oku ali mwilu, co amona vanu voshe.

¹⁴ Shukulu Kalunga natumbama a litanda lyendi oku nakenge asi ali voshe vaje vakalao.

¹⁵ Ikeye amanga viyongola vyavo vyoshe, nakuzivuka vyoshe vije vivalinga.

¹⁶ Mwene kesi kuhyana omwo nzili ya mashwalale vendi, co lishwalale kesi kuhyana omo nzili yendi embwe.

¹⁷ Tuvalu va nzita vanapu vangoco akuhyana, kuvasa kwamena munu omwo nzili yavo yakama.

¹⁸ Shukulu Kalunga akenga ali vaje vamukomoka, na ali vaje vakulaela a cizemo cendi cije kucesi kutenguluka,

¹⁹ amena myonyo yavo ku kutsa, nakuvayoyesa a simbu ya njala ya lyangengela.

²⁰ Muli Shukulu Kalunga mukemwo muli cinyangavili cetu, ikeye cishwamo cetu na mukwasi wetu.

²¹ Tulinakujolela muli ikeye, omwo tunakulaela mu lizina lyendi lyakujela.

²² Yove Shukulu Kalunga, cizemo cove cije kucesi kutenguluka, cikale netu omo cinyangavili cetu cili muli yove.