Myaso 32 - Livulu lya Shukulu Kalunga

Kulitavela nakusambesa

Mwaso wa Ndaviti

¹ Navezika munu uje ivanasambesa ku milonga yendi, munu uje vuvi vwendi vanavufwiki.

² Navezika munu uje Shukulu Kalunga kamulavela lalo vivi vyendi, munu uje kesi na makuli mu mbunge yendi.

³ Muvila wange wazeyele, omo kunjalitavelele vuvi vwange, co njakele nakukemanga litangwa lyoshe.

⁴ Mutanya na vutsiki Shukulu Kalunga wanjihisile, co nzili yange yoshe yahwile ngwe mulikomu litukuta lya nyangao.

⁵ Njalitavelele vivi vyange kuli yove, co kunjakushwekelele vuvi vwange, njalyendekesele mu mbunge yange ngwange, “Njikalitavela vivulumuna vyange kuli yove Shukulu Kalunga,” co yove wanjisambesele ku milonga ya vuvi vwange.

⁶ Ngecivene, voshe vaka-kulongwa vanapande kulombela kuli yove a simbu yakujeneka, co omo tuyando twakama twija, kutwasa kuvawana.

⁷ Yove unapu cishwamo cange, ukanjamena ku tuyando, njikaimba nakutambeka akwamena kwove, omwo yove ukanjinyungu.

⁸ Shukulu Kalunga nendeka ngwendi, “Njikakulongesa ngila ije iwunapande kwendelamo, co njikakulongesa nakukunangula.

⁹ Kesi mupwe ngwe kavalu nambe kupanga ngwe cimulu, vaje kuvesi na mana, vaje vavendesa na cikuvo ca mu kanwa, mukuvononwesa ngeci vende mwamuvwa.”

¹⁰ Vaka-vuvi vakayanda, oloni vaje vakulaela kuli Shukulu Kalunga vakavanyunga na cizemo cendi cije kucesi kutenguluka.

¹¹ Vwaeleleni nakujolela yeni vaka-vushunga, omwo vije vyanalingi Shukulu Kalunga! Tambekeni nakujolela yeni vaka-kumwononoka!