Myaso 31 - Livulu lya Shukulu Kalunga

Lilombelo lyakukulaela kuli Njambi

Mwaso wa Ndaviti

¹ Muli yove Shukulu Kalunga mukemwo munjiwana kuvanda, shwamwa kesi injikole, yove unapu Njambi wa vushunga, njilinakulomba ngeci unjamene!

² Tolilila ku kulomba kwange, co njikumbulule vwasi! Pwa limanya lyange lya vutewelo, cimpaka cange cakunjamena.

³ Yove limanya lyange na cimpaka cange, omwo lizina lyove, njitwamenene nakunjimwesa ngila.

⁴ Njinyunge mwamuvwa ku mweto uje vananjitela, omwo yove unapu u cimpaka cange.

⁵ Mu mavoko ove njikundika mwonyo wange, yove Shukulu Kalunga Njambi wa vushunga, yove unanjikulu.

⁶ Njazinda vaje vakalemesa vinjambi vyangoco, oloni yange njinakulaela kuli yove.

⁷ Njikavwaelela nakujolela, omwo cizemo cove cije kucesi kutenguluka. Unamono tuyando twange, yove uzivuka n̄avava yange.

⁸ Kuwatavele ngeci vitozi vange vanjifungulule, yove wanjitavesa kuya kwoshe kunjishaka.

⁹ Njizivileko mema ku mbunge yove Shukulu Kalunga, omwo njili mu tuyando, mesho ange anazimbi omwo kulila manene, mwa vushunga njinazeye manene!

¹⁰ Mwonyo wange unazeye omwo vusiwa, na myaka yange inapu ya tuyando, nzili yange inahu omwo vuvi vwange, co vitsiya vyange vinazeye.

¹¹ Vitozi vange voshe vunene vene vandambo vaje vanjinalyata navo, na voshe vaje vanjizivuka valinakunjitewa, omo vanjiwana mu ngila, co vatewa.

¹² Voshe vananjivala, ngwe munu uje watsa laja, yange njinalifu ngwe citambi ca ndeo civanombila kuti.

¹³ Njinazivi vitozi vavangi valinakuyeveta, co vyakujujwisa vyoshe vinanjizengeleka! Valinakutumba matumbe akunjitsiya.

¹⁴ Oloni njakulaela kuli yove Shukulu Kalunga, njendeka ngwange, “Yove u Njambi yange.”

¹⁵ Mwonyo wange woshe uli mu mavoko ove, njamene ku vitozi vange, na kuli voshe vaje vanjiyandesa.

¹⁶ Yange njinapu nji ngamba yove, kenga ali yange na ngozi, njamene na cizemo cove cije kucesi kutenguluka!

¹⁷ Shukulu Kalunga, shwamwa kesi injikole, omwo njilombela kuli yove, shwamwa ikole vaka-vuvi. Vanapande kwoloka kuluu mu vukalo vwa vatsi.

¹⁸ Olwesa vaje vaka-makuli, na voshe vaka-kulyalesa na vaka-kulindula, vaje vendeka na kayengu kuli vaka-vushunga!

¹⁹ Mwa vushunga ngozi yove yakama, ije iwunatulikila vaje vakukomoka, ije iwunapangela vaje vavanda muli yove, ku mesho a vana va vanu!

²⁰ Uvashweka nakuvanyunga mwamuvwa kuli yove, nakuvatundisa ku matumbe a vanu, co uvashweka mu cimpaka cacivwa, nakuvatundisa ku kashaundu ka vitozi vavo.

²¹ Shangazaleni Shukulu Kalunga! Omo wanjimwesele cizemo cendi cakukomokesa cije kucesi kutenguluka omo vanjizengelekele nakunjilwisa!

²² Njazivile lyova nakuyongola ngwange amo Shukulu Kalunga nanjumbila kuti. Oloni ikeye wazivile kulomba kwange, omo njatambekele ngeci anjikwase.

²³ Zemeni Shukulu Kalunga yeni voshe vanu vendi vakujela. Shukulu Kalunga anyunga vaka-kulongwa, oloni ahisa vaka-kulyalesa ngwe ku vilinga vyavo.

²⁴ Yeni voshe muli na cinyangavili muli Shukulu Kalunga koleseni nakusimpa.