Myaso 30 - Livulu lya Shukulu Kalunga

Lilombelo lya cikandelela

Mwaso wa Ndaviti wakukundika Njuvo ya Shukulu Kalunga

¹ Njikushangazala yove Shukulu Kalunga, omwo unanjamena, co kuwakengelelele vitozi vange ngeci valyalesele ali yange embwe.

² Yove Shukulu Kalunga Njambi yange, njalombelele kuli yove ngeci unjikwase, co yove wanjikangwisile.

³ Yove Shukulu Kalunga wanjitundisile mu vukalo vwa vatsi, unanjiyoyesa ngeci kesi njitse.

⁴ Yeni vanu vendi vakujela, imbeni nakushangazala Shukulu Kalunga! Anukeni vije vyanalingi uje Wakujela, co kandeleleni.

⁵ Omwo kuluvala kwendi kwa kasimbu lika, oloni vuvwa vwendi vwapwa vwa simbu yoshe. Kulila kukakalako a simbu ya vutsiki, oloni kujolela kukakalako ku mutondo.

⁶ Omo njakele na vufuko njalyendekesele yange vavenya ngwange, “Kuvakanjifungulula.”

⁷ Yove Shukulu Kalunga wapwile wamuvwa kuli yange, wanjinyungile mwamuvwa ngwe munkinda wa cimpaka. Oloni omo wanjikengesele nima, co njazivile manene lyova.

⁸ Njatambekele kuli yove Shukulu Kalunga, co njakulombele ngeci unjikwase.

⁹ Vikajo uwanao a kutsa kwange? Seo mukajo ukawanao nga njitsa? Kuma vatsi vasa kukushangazala ndi? Kuma vasa kwambulula vya kulongwa kwove kukwesi kuhwa ndi?

¹⁰ Yove Shukulu Kalunga njitolilile, nakunjizivilako mema ku mbunge! Pwa mukwasi wange!

¹¹ Unatengulula vusiwa vwange kuvupwisa kujolela, unatundisa vusiwa vwange nakunjana kujolela.

¹² Ngecivene, kunjikoloka kuluu embwe, njikaimba nakukushangazala. Shukulu Kalunga, yove u Njambi yange. Njikakukandelela ku myaka yoshe.