Myaso 28 - Livulu lya Shukulu Kalunga

Lilombelo lyakukwasa

Mwaso wa Ndaviti

¹ Njitambeka kuli yove Shukulu Kalunga cimpaka cange. Tolilila ku mutambi wange! Kesi unjolokele kuluu. Nga woloka kuluu kujeneka kunjikumbulula, co njikafwa ngwe vaje vashelumuka mu vukalo vwa vatsi.

² Njitolilile omo njitambeka kuli yove ngeci unjikwase, omo njolola mavoko ange ku Njuvo yove yakujela.

³ Kesi unjihisile amo na vaka-vuvi, amo na vaje vaka-kulinga vuvi, vanu vaje vaka-majwi akuseveleka, oloni vimbunge vyavo vinashulu na vizindo.

⁴ Vahise ngwe ku vije vivanalingi, a vuvi vuje vuvanalingi. Vahise a vilinga vyavo vyoshe, vahise ngwe ku vilinga vyavo!

⁵ Omo kuvesi nakwaka mbunge ku vije vyanalingi Shukulu Kalunga, nambe ku vije vyanatangele, ngecivene, akavahisa nakuvanyongesa ku myaka yoshe.

⁶ Vamushangazale Shukulu Kalunga, omwo nazivi mutambi wa lilombelo lyange!

⁷ Shukulu Kalunga akanjinyungu nakunjamena, njinakulaela kuli ikeye. Ikeye anjikwasa nakunjivwaelelesa, co njikaimba mwaso wakumushangazala.

⁸ Shukulu Kalunga akanyungu vanu vendi, ikeye akamena nakwovola mwene uje yanavwavesa.

⁹ Shukulu Kalunga amena vanu vove, co vezikisa vaje voshe vanapu vove. Pwa kanyungi kavo, vanyunge ku myaka yoshe.