Myaso 27 - Livulu lya Shukulu Kalunga

Lilombelo lyakushangazala

Mwaso wa Ndaviti

¹ Shukulu Kalunga ikeye ceke cange na muyoyesi wange, kunjikazivi lyova. Shukulu Kalunga ikeye muka-kunjamena ku vushonde vwoshe, kunjikatewe embwe.

² Omo vaka-vuvi vaija kuli yange nakunjilwisa, co vatanuka nakuwa.

³ Nameme nga mashwalale voshe vanjizengeleka, kunjizivi lyova embwe, nameme nga vitozi vanjilwisa, anga njikakulaela Njambi.

⁴ Njehwile Shukulu Kalunga cuma cimolika, cuma cimolika cinjishaka, kukala mu Njuvo ya Shukulu Kalunga simbu yoshe ya mwonyo wange, ngeci njimone vuvwa vwendi, nakumulomba ngeci anjitwamenene.

⁵ A simbu ya tuyando akanjishweka mu cimpaka cendi, co akanjinyunga mwamuvwa mu Njuvo yendi, co akanjitumbika a limanya lyalilaja.

⁶ Ngecivene, njikafungulula vitozi vange vaje vananjizengeleka, co njikakombelela vin̄ombelo nakujolela mu Njuvo yendi, njikaimba, nakushangazala Shukulu Kalunga!

⁷ Njitolilile omo njilombela kuli yove Shukulu Kalunga! Njizivileko mema ku mbunge ngeci unjikumbulule!

⁸ Omo wendekele ngwove, “Ija unjilemese,” co njakumbulwile ngwange, “Njiija, Shukulu Kalunga,

⁹ kesi unjikengese nima!” Kesi uluvale nange, kesi ushekele ngamba yove kulyala. Yove mukwasi wange, kesi unjiseze, nambe kunjikengesa nima, Njambi yange, muyoyesi wange!

¹⁰ Vatate na vanana vasa kunjumbila, oloni Shukulu Kalunga akanjinyunga.

¹¹ Shukulu Kalunga njilongese vije viwushaka ngeci njivilinge, co njitwamenene mu ngila yakujeneka vushonde, omwo njili na vitozi vavangi.

¹² Kesi unjikundike ku vitozi vange vaje valinakunjilwisa na makuli nakunjijujwisa.

¹³ Njazivuka ngeci njikamona vuvwa vwa Shukulu Kalunga mu lifuti lya vaka-kuyoya.

¹⁴ Kulaela kuli Shukulu Kalunga, kulaela, kesi uzeye. Kulaela kuli Shukulu Kalunga.