Myaso 26 - Livulu lya Shukulu Kalunga

Lilombelo lya munu wa vushunga

Mwaso wa Ndaviti

¹ Yove Shukulu Kalunga, njakwile mu vushunga akujeneka mulonga, omwo njikalingi vya vushunga, nakukukulaela na mbunge yange yoshe.

² Njiilule nakunjeseka yove Shukulu Kalunga. Eseka mbunge yange na viyongola vyange.

³ Cizemo cove cije kucesi kutenguluka cinjitwamenene, na kulongwa kwove kunjitwamenene simbu yoshe.

⁴ Kunjesi kukala amo na vanu vaka-makuli, nambe kusimutwiya na vaka-civembulu.

⁵ Yange njazinda munga ya vanu vaka-vuvi, co kunjesi kukala amo na vaka-vuvi.

⁶ Shukulu Kalunga, njijwela ku mavoko ange kumwesa ngeci kunjesi na mulonga, co njiya nakulemesa ku mutula wove.

⁷ Njikaimba mwaso wa cikandelela, nakwambulula vilinga vyove vyakukomokesa.

⁸ Njizema Njuvo yove muje muwakala yove Shukulu Kalunga, mu mwela muje mwakala vumpau vwove.

⁹ Kesi unjinyongesele kumo na vaka-vuvi embwe, njitundise kuli vaka-kutsiya,

¹⁰ vanu vaka-kulinga vuvi simbu yoshe, vakana lizika-kanwa.

¹¹ Oloni yange njikalingi vya vushunga, njizivileko mema ku mbunge, co njamene.

¹² Yange njinovoka ku vushonde vwoshe, njikashangazala Shukulu Kalunga mu mbunga yakama!