Myaso 25 - Livulu lya Shukulu Kalunga

Lilombelo lyakutwamenena nakunyunga

Mwaso wa Ndaviti

¹ Kuli yove Shukulu Kalunga njikundika mwonyo wange.

² Muli yove Njambi yange njinakulaela. Shwamwa kesi injikole, vitozi vange kesi vanjifungulule!

³ Mwa vushunga naumo wai akulaela kuli yove akaziva shwamwa, shwamwa ikola vaka-vungungu omwo kashwilo kai.

⁴ Njilongese vingila vyove yove Shukulu Kalunga, ngeci njivizivuke.

⁵ Njitwamenene mu vushunga vwove nakunjilongesa, omwo yove wapwa u Njambi yange muka-kunjamena. Kuli yove lika njinakulaela matangwa oshe.

⁶ Anuka kutetela kwove yove Shukulu Kalunga, na cizemo cove cije kucesi kutenguluka, vije viwasholwele tunde ku san̄ulu.

⁷ Njisambese ku vivi vyange na ku milonga ya a vukwenje vwange. Njanuke, Shukulu Kalunga! Omo cizemo cove cije kucesi kutenguluka na vuvwa vwove!

⁸ Omwo Shukulu Kalunga wapwa wa vushunga na vuvwa, akalongesa vaka-vuvi ngila ivanapande kwendelamo.

⁹ Ikeye akatwamenena muka-kulikeesa mu ngila yaivwa nakumulongesa cizango cendi.

¹⁰ Akatwamenena na cizemo cendi cije kucesi kutenguluka na vushunga vwendi, voshe vaje vanyunga cikumiiyo cendi, nakwononoka mashiko endi.

¹¹ Omwo a lizina lyove yove Shukulu Kalunga, njisambese ku vuvi vwange, omwo vwavungi manene.

¹² Vaje vakomoka Shukulu Kalunga vakavalongesa ngila ije ivanapande kwendelamo.

¹³ Simbu yoshe vakakala mwamuvwa, co vana vavo vakashwana mu lifuti.

¹⁴ Shukulu Kalunga wapwa musamba wa vaje vamwononoka, co akakolesa cikumiiyo cendi navo.

¹⁵ Mesho ange simbu yoshe akakenge kuli Shukulu Kalunga ngeci anjikwase, co anjamena ku vushonde.

¹⁶ Tengulukila kuli yange yove Shukulu Kalunga, nakunjizivilako mema ku mbunge, omwo njili ange lika, co njinazeye.

¹⁷ Njitundise cishota-mbunge, nakunjamena ku tuyando twange twoshe.

¹⁸ Yongola tuyando twange na n̄avava yange, co njisambese ku vuvi vwange vwoshe.

¹⁹ Yongola vitozi vange vanatumu, co vananjizindi manene!

²⁰ Njinyunge nakunjamena, njinyunge kuli vaka-kunjifungulula. Njiija kuli yove ngeci unjinyunge.

²¹ Vuvwa vwange na kasingimiko kange vinjinyunge, omwo njinakulaela kuli yove.

²² Yove Njambi, amena Isalele ku tuyando twendi twoshe!