Myaso 24 - Livulu lya Shukulu Kalunga

Mwene wakama

Mwaso wa Ndaviti

¹ Kaye na vyoshe vije vilimo vyapwa vya Shukulu Kalunga, asi na vanu voshe valiho vapwa vendi.

² Ikeye watungilile kaye a mema akulova mwisi ya livu, co wajalele luvula lwako a mema a kalunga akulova.

³ Veyajo vakalamata ku lilundu lya Shukulu Kalunga? Veyajo vanapande kwimana mu Njuvo yendi yakujela?

⁴ Kuvanga vaje vanajele mu vimbunge, nakulinga vipangi vyavivwa, vaje kuvesi kulemesa tumponya, nambe kulinga mazivasano a makuli.

⁵ Shukulu Kalunga akavavezikisa nakuvamena, Njambi akavapwisa vaka-kujeneka mulonga.

⁶ Vanu va cifwa cangacije vakevo vakashakezeka Shukulu Kalunga, vakevo vakashakezeka cihanga ca Njambi ya Yakomba.

⁷ Anjununeni vikolo, shokololeni mapito a ku myaka yoshe, Mwene wa vumpau akovelemo!

⁸ Iyajo ou Mwene wa vumpau? Ikeye Shukulu Kalunga Muka-nzili yakuhyana, Mwene muka-kuhyana mu vinzita!

⁹ Anjununeni vikolo, shokololeni mapito a ku myaka yoshe, Mwene wa vumpau akovelemo!

¹⁰ Iyajo ou Mwene wa vumpau? Shukulu Kalunga Muka-nzili yakuhyana, ikeye Mwene wa vumpau!