Myaso 22 - Livulu lya Shukulu Kalunga

Kutambeka omwo n̄avava na mwaso wakushangazala

Mwaso wa Ndaviti

¹ Njambi yange, Njambi yange, vikajo unanjisezela? Vikajo unemanena kulyala kujeneka kunjikwasa, omwo njilinakukemanga?

² Mutanya woshe njitambeka kuli yove Njambi yange, oloni kuwesi kunjikumbulula, njitambeka vutsiki vwoshe, oloni kunjesi kujuka embwe.

³ Oloni yove vanakutumbika a litanda kupwa Umo Wakujela, yove uje ivakashangazala vaIsalele.

⁴ Vakukulwila vetu vakulaelele muli yove, vakukulaelele, co yove wavamenene.

⁵ Vatambekele kuli yove, co vovokele, vakukulaelele, co shwamwa kuyavakolele.

⁶ Oloni yange kunjapwile lalo nji munu, njinapu lika nji musonginyi, njinapu nji munu wakushauka, munu uje ivakayeluwisa vanu voshe!

⁷ Voshe vaje vanjikenga vanjishendumuna, nakulipika ku mitwe yavo.

⁸ Co vendeka ngwavo, “Yove wakulaelele kuli Shukulu Kalunga, omwo vikajo lalo kakwamena? Nga Shukulu Kalunga wakushaka, vikajo kakukwasela?”

⁹ Oloni yove wanjinyungile tunde akusemuka na simbu yakunjilela.

¹⁰ Yove wanjinyungile tunde aje njasemukilile. Yove wapwa u Njambi yange.

¹¹ Kesi ukale kulyala nange! Omwo tuyando tuli muyehi, omwo kukwesi umo wakunjikwasa.

¹² Vitozi vavangi vananjizengeleka ngwe vingombe va nkomba, voshe vananjaka mukati, ngwe vingombe va nkomba va vukalu va ku lifuti lya Mbashane.

¹³ Vakevo vaneshama tunwa twavo ngwe vindumba, valinakwaana nakunjisanyozola.

¹⁴ Nzili yange inahu, ngwe mema akwitikila asi. Mu vitsiya vyange mwoshe munatsi njenje, co mbunge yange inasangunuka ngwe sela.

¹⁵ Mulivu wange unominina cau, co ndaka yange inasata mu ndakwilo. Yove unanjiseza mu livu ngeci njitsilemo.

¹⁶ Mbunga ya vaka-vuvi vananjizengeleka, vashwenya kuli yange ngwe tutali va vukalu, vakevo vanasanyozola mavoko na mendi ange.

¹⁷ Vitsiya vyange vyoshe vinasholoka anja kwau. Co vitozi vange vanakenge ali yange shwii,

¹⁸ valipangezela vuzalo vwange, nakuvuta n̄ela akati kavo.

¹⁹ Kesi ukale kulyala nange yove Shukulu Kalunga, ija vwasi wakunjamene!

²⁰ Njamene ku moko ya mukwale, amena mwonyo wange ku vitozi.

²¹ Njamene ku vitozi vange ava, omo kunjesi na nzili yakulwa navo.

²² Njikaleka vanu vange vije viwunalingi, njikakushangazala mu cikungulukilo cavo ngwange,

²³ “Mushangazaleni, yeni vangamba va Shukulu Kalunga! Musingimikeni, yeni vatekulwila va Yakomba! Mulemeseni, yeni vanu va Isalele!

²⁴ Ikeye kesi kumbila kuti tuutu, nambe kuyengula tuyando twavo, nambe kuvakengesa nima, oloni avakumbulula omo vatambeka kuli ikeye mukuvakwasa.”

²⁵ Mu mbunga yakama njikakushangazala, omwo vije viwunalingi, ku mesho a vaje vaka-kukulemesa njikakombelela vin̄ombelo vije vinjakukulaesele.

²⁶ Tuutu vakalya nakukuta, voshe vaje vaija kuli Shukulu Kalunga vakamushangazala, vapwe vakuvezika ku myaka yoshe.

²⁷ Miyati yoshe vakanuka Shukulu Kalunga, mitambela yoshe ya mu kaye vakatengulukila kuli ikeye, co vanu voshe vakamulemesa.

²⁸ Omwo vumwene vwapwa vwa Shukulu Kalunga, ikeye akashwana miyati yoshe.

²⁹ Vaka-kulyalesa voshe vakalya nakumulemesa, na voshe vaje vashelumukila mu vukalo vwa vatsi vakamulemesa, co na woshe uje kasa kwamena mwonyo wendi ku kutsa akamulemesa.

³⁰ Visemwa vya vanu vya kulutwe vakamupangela, vanu vakendeka vya Shukulu Kalunga ku cisemwa cije cikaija kulutwe.

³¹ Vanu vaje kanda vasemuke vakavaleka ngwavo, “Shukulu Kalunga wamenene vanu vendi!”