Myaso 21 - Livulu lya Shukulu Kalunga

Kushangala akuhyana

Mwaso wa Ndaviti

¹ Mwene ajolela omwo yove Shukulu Kalunga unamwana nzili, avwaelela omwo unamuhyanesa.

² Unamwana vije vyajenekele, nakukumbulula vije vyakulombele.

³ Wezile kuli ikeye na vivezikiso vyavivwa, nakumuzika cilongo ca ngolinde yaivwa ku mutwe wendi.

⁴ Ikeye wakulombele mwonyo, co wamwanenewo, mwonyo wa myaka yoshe.

⁵ Vumpau vwendi vwakama omwo kukwasa kwove, unamutsimanesa nakumwamesa.

⁶ Omwo unamupwisa wakuvezika ku myaka yoshe, co unamuvwaelelesa nakujolela ku mesho ove.

⁷ Omwo mwene nakulaela kuli Shukulu Kalunga Muka-nzili yoshe, co omwo a cizemo cove cije kucesi kutenguluka, kakapelyangela embwe.

⁸ Livoko lyove likafungulula vitozi vove voshe, co livoko lyove lya cilyo likafungulula vaje voshe vakuzinda.

⁹ Omo akasholoka akavanyongesa ngwe mulukanyongesa lutengo lwa tuhya. Shukulu Kalunga akavanyongesa mu vukalu vwendi, co tuhya tukavanyongesa njwa.

¹⁰ Naumo wai wa ku vatekulwila vavo akasalao, voshe mwene akavatsiya.

¹¹ Nameme vatumba matumbe avo amavi akumulwisa, oloni kuvakamufungulula embwe.

¹² Ikeye akavasha mikili yendi, co vakatewa.

¹³ Tukushangazala yove Shukulu Kalunga, omwo nzili yove yapwa yakama! Tukaimba nakushangazala nzili yove.