Myaso 19 - Livulu lya Shukulu Kalunga

Vumpau vwa Njambi mukutanga

Mwaso wa Ndaviti

¹ Melu ambulula vumpau vwa Njambi! Kaye kasholola vipangi vya mavoko endi!

² Litangwa na litangwa vanu vamona vumpau vwa Njambi, vutsiki na vutsiki vasa kumona vukama vwa Njambi.

³ Kuvesi kwendeka majwi ngwe muvakendeka vanu,

⁴ oloni vivakendeka vaviziva kwoshe-ikwoshe, kuje kwakala vanu ano asi. Njambi navwaesela litangwa mwela mwilu,

⁵ omo litangwa lituuka mutondo linapu ngwe shombolwa, uje atuuka mu njuvo yendi, linapu lalo ngwe muka-kushatuka, uje ali na cizango cakuhyana.

⁶ Likelyo lituukila ku shongo imo ya lilu, nakulaukila ku shongo ikwavo ya lilu, cuma nacimo cai casa kuvanda ku ntwima yalyo.

Mashiko a Shukulu Kalunga

⁷ Mashiko a Shukulu Kalunga apwa akulumbunuka, akewo akolesa mwonyo. Mashiko a Shukulu Kalunga apwa amavwa kuwakulaela, aana mana kuli vaje vanawajeneka.

⁸ Mashiko a Shukulu Kalunga apwa a vushunga, voshe vaje vawononoka vavwaelela. Mashiko a Shukulu Kalunga apwa akujela, aana munu mana akuzivisisa.

⁹ Kukomoka Shukulu Kalunga kunapu kwakuvwa ku myaka yoshe, mashiko a Shukulu Kalunga simbu yoshe apwa a vushunga.

¹⁰ Apwa amavwa manene, anatuvakana ngolinde yaivwa manene, nakutuvakana lalo vuki vwa mwenga.

¹¹ Akewo anjinangula yange ngamba yove, njinatambula cikandelela akuwononoka.

¹² Naumo wai asa kumona milonga yendi vavenya, njisambese Shukulu Kalunga ku milonga ya kushweka!

¹³ Njinyunge mwamuvwa ku vuvi vwa cizango, kesi utave vunjishwane. Ngecivene, njikapwe wakulumbunuka nakupatuka ku vuvi.

¹⁴ Majwi ange na viyongola vyange, vipwe vyavivwa ku mesho ove Shukulu Kalunga, limanya lyange na numbi yange ya lukule milonga!