Myaso 18 - Livulu lya Shukulu Kalunga

Mwaso wa Ndaviti wakuhyana

Awa akewo majwi a Ndaviti, ngamba ya Shukulu Kalunga, mwaso wembilile Shukulu Kalunga a litangwa lije lyamwamenene ku livoko lya Saulu na ku vitozi veka lalo.

¹ Njikushangazala yove Shukulu Kalunga! Yove muka-kunjamena ku vushonde.

² Shukulu Kalunga ikeye muka-kunjinyunga, ikeye wapwa cimpaka cange cakukola. Njambi yange ikeye wapwa cishwamo cange, muli ikeye mukemwo munjitewela. Ikeye wapwa ntelo yange, muka-kunjamena nakunjinyunga mwamuvwa.

³ Njitambeka kuli Shukulu Kalunga, co ikeye anjamena ku vitozi vange. Shangazaleni Shukulu Kalunga!

⁴ Kutsa kwanjizengelekele ngwe linimbwa, mankimba akunjinyongesa anjifwikile.

⁵ Kutsa kwanjizengelekele ngwe linimbwa, co vinganjo vya mbumbo vyanjishwikile.

⁶ Mu simbu yange ya tuyando, njatambekele kuli Shukulu Kalunga, njatambekele kuli Njambi yange ngeci anjikwase. Mu Njuvo yendi wazivile lijwi lyange, ikeye watolililile ku mutambi wange wa akukwasa.

⁷ Omo Njambi waluvalele, asi aningangele nakujaja, na maluvula a minkinda alinikile nakushengenya!

⁸ Co vwisi vwatuukile mu majulu endi, mulangi wakunyongesa, na manungu a tuhya vyatundile mu kanwa kendi.

⁹ Watavwile lilu nakulisholola, wezile ano asi, co lishelwa lyakuzivala vwii lyakele mwisi ya mendi endi.

¹⁰ Ikeye wapulwile vwasi akamwa ya kelumbi, co wendele a mambava a lihunzi.

¹¹ Wavandele mu lisusulungu, mashelwa a kuhima a nyonzi amufwikile.

¹² Nyonzi ya mamanya na milangi ya tuhya vyatundile ku mihyato ije yakele kulutwe lwendi. Co vyasholokele mu mashelwa akuzivala.

¹³ Asinoni Shukulu Kalunga walumine mwilu, na lijwi lya wa Akamwa ya Akamwa valizivile.

¹⁴ Co ikeye washele mikili yendi nakushandola vitozi vendi, nakuhyahyata kwa mihyato wavashekele.

¹⁵ Kwisi ya mema a kalunga kwasholokele, co luvula lwa kaye lwafukukile omo wakandele vitozi vove, yove Shukulu Kalunga, waluvalele nakwaana ngwe ndumba.

¹⁶ Shukulu Kalunga wolwele livoko lyendi oku ali mwilu nakunjikwata, co wanjijavulwile mu mema akulova.

¹⁷ Wanjamenene ku vitozi vange va nzili, na kuli voshe vaje vanjizindile, omwo vanjihyanene nzili.

¹⁸ Omo njakele mu tuyando vanjilwisile, oloni Shukulu Kalunga wanjinyungile.

¹⁹ Wanjikwasele kunjitundisa mu vushonde, wanjamenene omwo wavwaelelele nange.

²⁰ Shukulu Kalunga anjana cikandelela omwo nji muka-kulinga mwamuvwa, ikeye anjivezikisa omwo kunjesi na mulonga.

²¹ Njinononoka lishiko lya Shukulu Kalunga, co kunjakengesele nima Njambi yange.

²² Njinanyungu mashiko endi oshe, kunjavyanene kwononoka mashiko endi embwe.

²³ Nazivuka ngeci kunjesi na mulonga, co njalinyunga ku vuvi.

²⁴ Ngecivene, anjana cikandelela omwo njikalingi vyavivwa, omwo azivuka ngeci kunjesi na mulonga.

²⁵ Shukulu Kalunga, yove wapwa wa kulongwa kuli vaje va kulongwa kuli yove, co wapwa wamuvwa kuli vaje vavavwa.

²⁶ Yove wapwa wakujela kuli vaje vakujela, oloni ukamwesa vukalu kuli vaka-vuvi.

²⁷ Yove ukamena vaje vaka-kulikeesa, oloni ukakeesa vaje valyalesa.

²⁸ Yove Shukulu Kalunga wapwa ceke, tundisa lisusulungu lyange.

²⁹ Njane nzili yakulwisa vitozi vange, na nzili yakufungulula vimpaka.

³⁰ Ou Njambi vilinga vyendi vyapwa vyakulumbunuka, na majwi endi apwa akulitulao! Ikeye wapwa ntelo kuli voshe vaje vatewela muli ikeye.

³¹ Shukulu Kalunga endi lika ikeye Njambi, Njambi endi lika ikeye cimpaka cetu.

³² Ikeye Njambi muka-kunjana nzili, uje avwaesa ngila yange kupwa yakujela.

³³ Ikeye ashatukisa mendi ange lumbisi ngwe shonge, anjinyunga mwamuvwa a minkinda.

³⁴ Ikeye anjilongesa kulwa nzita, ngecivene, mavoko ange ase kunana vuta vwa lusipa vwakukola.

³⁵ Njinyunge nakunjamena yove Shukulu Kalunga, kunyunga kwove kunanjitsimanesa, na nzili yove inanjinyungu mwamuvwa.

³⁶ Yove unanjinyungu kunjitundisa mu vundungo, co nalumo lwai njinau.

³⁷ Njisheka vitozi vange nakuvafungulula, kunjilikela noo njinavanyongesa.

³⁸ Njivawisila asi, co kuvasa lalo kwindukao, valala ku myanja yange omo njinavafungulula.

³⁹ Omwo yove unanjana nzili yakulwa nzita nakufungulula vitozi vange.

⁴⁰ Yove u muka-kusheka vitozi vange ngeci vatunde kuli yange, co njinyongesa vaje vanjizinda.

⁴¹ Vatambeka ngeci vavakwase, oloni naumo wai avamena, vatambeka kuli Shukulu Kalunga, oloni kavakumbulula.

⁴² Njivatsena tsenu-tsenu ngwe likungu lije lipekumuka na lihunzi. Njivalyatangela ngwe lindova lya mu vingila.

⁴³ Yove unanjamena kuli vanu vaka-kutengulukila, nakunjipwisa muka-kushwana miyati, vanu vaje kunjazivukile ololo vanjipangela.

⁴⁴ Vaka-kwija vatsikama kuli yange, omo vaziva lijwi lyange, co vanjononoka.

⁴⁵ Kusimpa kwavo kulinakuhwa, co vakatunda mu vimpaka vyavo oku vajaja.

⁴⁶ Shukulu Kalunga wayoya! Shangazaleni muka-kunjilwila! Ambululeni vukama vwa Njambi muka-kunjamena.

⁴⁷ Ikeye muka-kunjihyanesa ku vitozi vange, nanjifungulwila miyati ngeci vakale mwisi yange,

⁴⁸ nakunjamena ku vitozi vange. Yove Shukulu Kalunga njihyanese ku vitozi vange nakunjinyunga ku vaka-lwozi.

⁴⁹ Ngecivene, njikakushangazala akati ka miyati, njikaimba nakukushangazala.

⁵⁰ Njambi akana kuhyana kwakama kuli mwene yendi, asholola cizemo cendi cije kucesi kutenguluka kuli uje wendi yanaangula, kuli Ndaviti na vatekulwila vendi ku myaka yoshe.