Myaso 17 - Livulu lya Shukulu Kalunga

Lilombelo lya munu wa kulongwa

Lilombelo lya Ndaviti

¹ Yove Shukulu Kalunga, tolilila mutambi wange wakukulambelela ngeci unjilingile vushunga, ziva mutambi wange wakunjikwasa! Ziva lilombelo lyange lya vushunga.

² Yove ukanjisompela mu vushunga, omwo yove uzivuka vije vya vushunga.

³ Yove uzivuka mbunge yange. Yove unaija kuli yange a simbu ya vutsiki. Unanjiilula mwamuvwa, co kuwawanene mashungu a vuvi muli yange.

⁴ Yange kunjesi kwendeka vyavivi ngwe muvakendeka vakwetu, co njinononoka mashiko ove, kunjakavangeyeye vingila vya vaka-vuvi.

⁵ Visimbu vyoshe njinende mu ngila yove, co kunjatundilemo.

⁶ Njilomba kuli yove Njambi yange, omwo ukanjikumbulula, co tolilila majwi ange.

⁷ Sholola cizemo cove cakukomokesa co njamene, yove ukanjamena na livoko lyove lya cilyo ku vitozi vange.

⁸ Njinyunge ngwe muukanyungu mun̄andi wa lisho, co njinyunge ngwe mwakanyungu kazila vana vendi mu mambava endi

⁹ nakunjamena kuli vaka-vuvi vaje valinakunjilwisa. Vitozi vange vananjizengeleka, co vashaka kunjitsiya,

¹⁰ vakevo kuvesi na mema ku mbunge, co vendeka na kulyalesa.

¹¹ Ololo vananjizengeleka laja, vashakezeka akunjiwanena ngeci vanjilwise.

¹² Vakevo vanafu ngwe vindumba, vashaka kunjisanyozola sanyu-sanyu, ngwe vakwenje va vindumba valinakumwengelela mu vushweke.

¹³ Ija, yove Shukulu Kalunga, popolola vitozi vange nakuvafungulula! Njamene kuli vaka-vuvi na moko yove ya mukwale.

¹⁴ Yove Shukulu Kalunga, njamene na livoko lyove ku vanu vaje valinakuvwaelela nakuyoya kwa ano asi. Vahise na tuyando tuje tuwavatulikila, tupwe twatungi kuli vana vavo, tupwe lalo twatungi kuli vatekulwila vavo!

¹⁵ Oloni yange njikamona cihanga cove mu vushunga, co omo njikakasumuka mu tulo, njikajolela akumona cifwa cove.