Myaso 16 - Livulu lya Shukulu Kalunga

Lilombelo lyakukulaela

Mwaso wa Ndaviti

¹ Yove Njambi njinyunge, omwo muli yove mukemwo njiwana kuvanda.

² Njendeka kuli yove Shukulu Kalunga ngwange, “Yove unapu u Shukulu yange, vyuma vyoshe vyavivwa vinjilinavyo, vyatunda kuli yove.”

³ Vanu va Shukulu Kalunga vaje vakujela vali ano asi, vanapu va vulemu, njilinakuvwaelela muli vakevo.

⁴ Vaje vapangela vinjambi veka, valikokela tuyando twakama, oloni yange kunjikalipandakana navo ku vin̄ombelo vyavo, nambe kulemesa vinjambi vavo.

⁵ Yove Shukulu Kalunga, yove lika wapwa wange, unjana vyoshe vinjajena, kuyoya kwange kwoshe kuli mu mavoko ove.

⁶ Vwana vwove vunapu vwakukomokesa, vukevwo vwavuvwa manene kuli yange!

⁷ Njikushangazala yove Shukulu Kalunga, omo unanjana mana. Nameme simbu ya vutsiki mbunge yange injinangula.

⁸ Simbu yoshe Shukulu Kalunga ali muyehi nange mukunjikwasa, co nacimo cai casa kunjizivisa lyova.

⁹ Ngecivene, mbunge yange ivwaelela nakujolela, co njikakala mwamuvwa kujeneka lyova,

¹⁰ omwo kuukanjiseze mu vukalo vwa vatsi, nameme kutava muka-kujela wove ngeci akanyonge.

¹¹ Unanjimwesa ngila itwala ku mwonyo, co njivwaelela kukala kuyehi nove, simbu yoshe njivwaelela akunyunga kwove.