Myaso 148 - Livulu lya Shukulu Kalunga

Mutambi wa vyoshe vyakutanga vishangazale Njambi

¹ Shangazaleni Shukulu Kalunga! Shangazaleni Shukulu Kalunga mwilu ya melu!

² Mushangazaleni, yeni tungelo twendi voshe, mushangazaleni, yeni mbunga yendi ya mwilu!

³ Mushangazaleni, litangwa na ngonde, mushangazaleni, vingongonosi vyoshe vyakuvyazima!

⁴ Mushangazaleni, yeni melu ya melu, neni mema akala akamwa ya melu!

⁵ Vyuma vyoshe vishangazale lizina lya Shukulu Kalunga! Omwo ikeye washikile, co vavitangele.

⁶ Akushika kwendi wavyakele mu myela yavyo ku myaka yoshe, lishiko lyendi kulikatenguluka embwe.

⁷ Vyuma vyoshe vili ano asi vishangazale Shukulu Kalunga, vikashama va mu mema a kalunga na vinzinga vyoshe vya mema a kalunga,

⁸ muhyato na nyonzi ya mamanya, mema akukonda na mashelwa, lihunzi lyakama lije lyononoka kushika kwendi!

⁹ Mushangazaleni, yeni malundu na minkinda, miti ya vushuka na miti ya kendale,

¹⁰ tusitu voshe na vingombe voshe, tusitu vakulikoka na tuzila vakupulula!

¹¹ Mushangazaleni, yeni vimyene na vanu voshe, vana va vimyene na vaka-kushwana voshe,

¹² vakwenje na vambanda, vakulunu na vanike lalo!

¹³ Vyuma vyoshe vyakutanga vishangazale lizina lya Shukulu Kalunga! Omwo lizina lyendi lyapwa lyakama kuhyana mazina oshe, vumpau vwendi vwapwa vwakama kuhyana lilu na asi!

¹⁴ Wakolesele muyati wendi na nzili, ngeci vanu vendi voshe vamushangazale, vanu vendi va Isalele, vaje vazema manene! Shangazaleni Shukulu Kalunga!