Myaso 147 - Livulu lya Shukulu Kalunga

Kushangazala Njambi Muka-nzili yoshe

¹ Shangazaleni Shukulu Kalunga! Mwamuvwa kwimba myaso kuli Njambi yetu yakumushangazala, cinapu cacivwa na vushunga kumushangazala.

² Shukulu Kalunga atungulula Yelusalema, elwisa vanu va mu Isalele ku vunzinda.

³ Akangwisa vaka-kuzeya mu vimbunge, nakusaka vimbandu vyavo.

⁴ Ikeye alava vingongonosi nakuviluka mazina avyo vyoshe.

⁵ Shukulu Kalunga ketu wapwa wakama, na nzili yendi yapwa yakama, ikeye azivuka vyuma vyoshe.

⁶ Shukulu Kalunga akakwasa vaka-kulikeesa, oloni vaka-vuvi avawisila asi.

⁷ Imbileni Shukulu Kalunga myaso yakumushangazala, imbileni Njambi yetu myaso yakumushangazala a tulyalya.

⁸ Ikeye wafwika melu na mashelwa, nakunyokesa nyonzi ano asi, ngeci a malundu amene mwila.

⁹ Ikeye aana vyakulya ku tusitu nakulisa vana va makololo omo vatambeka.

¹⁰ Shukulu Kalunga kesi kuvwaelela mu nzili ya tuvalu, nambe kesi kuvwaelela na mashwalale vakunyanyama,

¹¹ oloni avwaelela lika muli vaje vamukomoka, na muli vaje voshe vakulaela mu cizemo cendi cije kucesi kutenguluka.

¹² Yove Yelusalema shangazala Shukulu Kalunga! Yove Siyone shangazala Njambi yove!

¹³ Omwo ikeye akolesa vikolo vyove, nakuvezikisa vanu vove.

¹⁴ Ikeye aana kwoloka kuluu ku vinginga vyove, nakukwana tiliku yaivwa ngeci ulye.

¹⁵ Atuma mashiko endi ano asi, co vanu vawononoka.

¹⁶ Afwika asi na mbundu ngwe nanga yakutoka, nakushandola mema akukonda ngwe lito.

¹⁷ Atuma nyonzi ya mamanya ngwe mamanya akutavozola, naumo wai asa kusimpa ku lisika lije lyakatumu.

¹⁸ Asinoni ashika, co aje mema akukonda asangunuka, atuma lalo lihunzi, co mema enda.

¹⁹ Atuma majwi endi kuli vanu vendi, atuma vilongesa vyendi na mashiko endi ku Isalele.

²⁰ Kalingile cuma eci na miyati yeka embwe, omwo vakevo kuvazivuka mashiko endi. Shangazaleni Shukulu Kalunga!