Myaso 146 - Livulu lya Shukulu Kalunga

Kushangazala Njambi Muyoyesi

¹ Shangazaleni Shukulu Kalunga! Mbunge yange shangazala Shukulu Kalunga!

² Njikashangazala Shukulu Kalunga mukuyoya kwange kwoshe! Njikaimba mwaso wakushangazala Njambi yange, mukuyoya kwange kwoshe.

³ Kesi ukulaele vantwama va ano asi embwe, munu naumo wai asa kukwamena.

⁴ Omo munu atsa, co eluka ku livu, matumbe endi oshe ahwa a litangwa lije atsa.

⁵ Navezika munu uje ali na Njambi ya Yakomba ngeci amukwase, munu uje cinyangavili cendi cili muli Shukulu Kalunga Njambi yendi,

⁶ Ishamatanga uje watangele lilu, na asi na mema a kalunga na vyoshe vije vilimo. Ikeye muka-kunyunga cikulaeso cendi simbu yoshe,

⁷ ikeye asompela mwa vushunga vaka-kuyanda nakwana vyakulya kuli voshe vali na njala. Shukulu Kalunga apatula vinzinda,

⁸ co atonesa mesho a tupuputwa. Ikeye aana nzili kuli voshe vaje vanazeye nakuzema vaka-vushunga.

⁹ Shukulu Kalunga anyunga vangenzi vaje vali mu lifuti lyetu, ikeye akwasa vifwile na visiwa, oloni vaka-vuvi avanyongesa.

¹⁰ Shukulu Kalunga ikeye mwene wa ku myaka yoshe! Yove Siyone Njambi yove akashwana simbu yoshe. Shangazaleni Shukulu Kalunga!