Myaso 145 - Livulu lya Shukulu Kalunga

Mwaso wakushangazala

Mwaso wa Ndaviti

¹ Njikakwalesa Njambi yange na mwene yange, njikashangazala lizina lyove ku myaka yoshe.

² A litangwa na litangwa njikakushangazala, nakwalesa lizina lyove ku myaka yoshe.

³ Shukulu Kalunga wapwa wakama, co vanapande kumushangazala manene, naumo wai asa kuzivuka vukama vwendi.

⁴ Cisemwa na cisemwa cikashangazala vyuma vije viwunalingi, vakambulula vipangi vyove vya nzili.

⁵ Vanu vakambulula vumpau vwove, na vulemu vwove, co yange njikayongola a vilinga vyove vyakukomokesa.

⁶ Vanu vakendeka a vilinga vyove vya nzili, co yange njikambulula a vukama vwove.

⁷ Vanu vakendeka vyavuvwa vwove vwoshe, nakwimba a ngozi yove.

⁸ Shukulu Kalunga ikeye muka-kutetela na mema ku mbunge, kesi kuluvala vwasi, oloni washula na cizemo cije kucesi kutenguluka.

⁹ Shukulu Kalunga wapwa wamuvwa kuli voshe, muka-kutetela vyuma vyoshe vije vyatangele.

¹⁰ Vitanga vyove vyoshe vikakushangazala Shukulu Kalunga, na vaka-kujela vove voshe vakakwalesa.

¹¹ Vakendeka vya vumpau vwa vumwene vwove, nakwambulula a nzili yove,

¹² ngecivene, vanu voshe vakazivuke vilinga vyove vya nzili, na vumpau vwa vumwene vwove.

¹³ Vumwene vwove vwapwa vwa ku myaka yoshe, co yove wapwa u mwene wa ku myaka yoshe. Shukulu Kalunga wapwa muka-vushunga ku cikulaeso cendi, wapwa lalo wa cizemo ku vyoshe vije vyatangele.

¹⁴ Ikeye muka-kukwasa voshe vaje vali mu tuyando, nakwana lalo nzili kuli voshe vaje vanazeye.

¹⁵ Vyuma vyoshe vyakuyoya vilinakukenga na cinyangavili kuli yove, co yove uvana vyakulya a simbu yaivwa.

¹⁶ Yove uvana vyakulya vyakupwisamo, nakuvakutisa voshe na vyakulya.

¹⁷ Shukulu Kalunga wapwa wa vushunga mu vyuma vyendi vyoshe vyakalingi, wakala na mema ku mbunge mu vilinga vyendi vyoshe.

¹⁸ Ikeye ali muyehi na vanu vaje voshe vatambeka kuli ikeye, vanu vaje vatambeka kuli ikeye mu vushunga.

¹⁹ Ikeye akutisa vizango vya vaje vamukomoka, aziva mitambi yavo, co avamena.

²⁰ Shukulu Kalunga akanyungu voshe vaje vamuzema, oloni vaka-vuvi akavanyongesa.

²¹ Shukulu Kalunga, simbu yoshe njikakushangazala, vyuma vyoshe vije vyanatanga vishangazale lizina lyendi lyakujela ku myaka yoshe!