Myaso 144 - Livulu lya Shukulu Kalunga

Mwene akandelela kuli Njambi akumuhyanesa

Mwaso wa Ndaviti

¹ Wakushangazala Shukulu Kalunga muka-kunjinyunga, muka-kunjilongesa mwakulwila nzita, nakunjivwaesela cimweja kulwa.

² Ikeye muka-kunjinyunga na muka-kunjamena, cimpaka cange na muyoyesi wange, muli ikeye njitewela. Ikeye anjifungulwila miyati yeka ngeci njivashwane.

³ Munu wapwa iyajo kuli yove Shukulu Kalunga, ngeci umuyongole? Munu uje kesi na seo ngeci umutolilile?

⁴ Munu napu ngwe muku, na matangwa endi akuyoya anapu ngwe munzinze uje ulinakwita.

⁵ Nyenyumwisa melu ove Shukulu Kalunga, ngeci ushulukile ano asi, kwata a minkinda ngeci ikakumwise vwisi.

⁶ Tuma mihyato, co shandola vitozi vove, asha mikili yove, ngeci vatewele kulyala!

⁷ Livoko lyove litunde mwilu, liije ano asi nakunjamena. Njipatule nakunjamena ku mema amangi, na ku nzili ya vaka-kwija.

⁸ Vaka-kwija vaje vakendeka makuli, nakulisinga vya makuli.

⁹ Njikaimba mwaso wauha kuli yove Njambi, njikaimba kalyalya nakukwimbila mwaso.

¹⁰ Yove muka-kuhyanesa vimyene, nakupatula ngamba yove Ndaviti.

¹¹ Njovole ku vitozi vange vaka-muuka, njipatule ku nzili ya vaka-kwija, vaje vakendeka makuli, nakulisinga vya makuli.

¹² Vana vetu va vanalume a vukwenje vwavo, vapwe ngwe miti yakukuna, ije ilinakukula na nzili, co vana vetu va vanakazi, vapwe ngwe vimanda vya mu vimbango vya lipela vyakushonga mwamuvwa.

¹³ Vishete vyetu lalo vishule na vimbuto vyakuliseza-seza, na vimanga vyetu lalo va mu vyana vyetu, vaseme visimbu vyavingi-vingi.

¹⁴ Vingombe vyetu vasemunwine nakutuma manene-nene, kujeneka kupulumwisa, nambe kwonwa kusema. Mu vitapalo vyetu lalo kesi mukale mitambi yakulila embwe.

¹⁵ Vanavezika vanu vaje vatambula vivezikiso evi, vanavezika vanu vaje Njambi yavo ikeye Shukulu Kalunga.