Myaso 143 - Livulu lya Shukulu Kalunga

Lilombelo lyakukwasa

Mwaso wa Ndaviti

¹ Ziva lilombelo lyange Shukulu Kalunga, mu vushunga vwove tolilila kukulomba kwange! Njikumbulule mu kulongwa kwove.

² Kesi usompese yange ngamba yove, omwo kukwesi umo wa kulongwa kuli yove.

³ Citozi cange nanjisheke, co nanjifungulula, nanjilingisa ngeci njikale mu lisusulungu, co njinafu ngwe munu wa kutsa.

⁴ Ngecivene, mwonyo wange unazeye, na mbunge yange lalo inaombwa.

⁵ Njanuka matangwa a ku san̄ulu, nakuyongola a vipangi vyove vyoshe, nakuyongola vipangi viwalingile na mavoko ove.

⁶ Njolwela mavoko ange kuli yove mukulombela, omwo mwonyo wange ukuzivila lihwila, ngwe lifuti lyakuminina livandamena nyonzi.

⁷ Njikumbulule vwasi Shukulu Kalunga cinyangavili cange coshe cinahu! Kesi unjikengese nima, kutewa njitsa.

⁸ A mutondo a mutondo, njanukise vya cizemo cove, cije kucesi kutenguluka omwo njinakulaela kuli yove. Malombelo ange ete kuli yove, njimwese ngila munjinapande kwendela.

⁹ Shukulu Kalunga njipatule ku vitozi vange, njinatewela kuli yove ngeci unjishweke.

¹⁰ Njilongese kulinga cizango cove, omwo yove wapwa u Njambi yange. Munzinzime wove wauvwa, unjitwamenene mu ngila yaivwa.

¹¹ Nyunga mwonyo wange Shukulu Kalunga, ngwe muje muwanjikulaesele, mu vushunga vwove, njamene ku tuyando twange!

¹² Omwo cizemo cove kuli yange, cije kucesi kutenguluka tsiya vitozi vange, nakunyongesa voshe vaje vaka-kunjiyandesa, omwo yange njapwa nji ngamba yove.