Myaso 140 - Livulu lya Shukulu Kalunga

Lilombelo lyakunyunga

Mwaso wa Ndaviti

¹ Njamene kuli vaka-vuvi Shukulu Kalunga, njinyunge kuli vaka-muuka.

² Vanu vaje simbu yoshe vatumba matumbe amavi, co simbu yoshe vashangumuka vukalu.

³ Majwi avo anafu ngwe vushungu vwa manyoka, anafu ngwe vushungu vwa lishuko.

⁴ Njinyunge kuli vanu va muuka Shukulu Kalunga, vanu vaje vatumba matumbe akunjinyongesa.

⁵ Vaka-kulyalesa vananjitela mweto, vanatanduvula mikole ngwe linimbwa, vananjitela myeto kumukulo wa ngila ngeci njitsemo.

⁶ Njendeka kuli Shukulu Kalunga ngwange, “Yove wapwa u Njambi yange.” Ziva kulomba kwange, Shukulu Kalunga.

⁷ Yove Shukulu Kalunga Njambi yange wa Akamwa ya Vyoshe, yove muka-kunjamena mu nzita.

⁸ Shukulu Kalunga, kesi waane vaka-vuvi vije vivashaka, kesi utave matumbe avo amavi aye kulutwe!

⁹ Kesi utave vitozi vange vahyane, tuyando twavo tuvelukile vakevo vavenya.

¹⁰ Manungu a tuhya avalundumukile, vombile mu linzenzengoma muje kuvasa kutunda.

¹¹ Vaje vaka-kuvangeya vakwavo kesi vahyane embwe, vuvi vukayomba vaka-muuka nakuvanyongesa.

¹² Shukulu Kalunga, njazivuka ngwange yove ukamena tuutu, nakwimanena vushunga vwa vaje vanajeneka.

¹³ Mwa vushunga vaka-vushunga vakakushangazala, vakakala amo nove.