Myaso 139 - Livulu lya Shukulu Kalunga

Mana a Njambi nakunyunga kwendi

Mwaso wa Ndaviti

¹ Unanjiilula yove Shukulu Kalunga, co unanjizivuka.

² Yove uzivuka vyuma vyoshe vinjikalingi, nambe uli kulyala, oloni uzivuka viyongola vyange vyoshe.

³ Yove ukanjimono, nambe njilinakupanga, nambe njilinakuhwima, uzivuka vilinga vyange vyoshe.

⁴ Nameme omo kanda njicendeke, yove wazivuka laja vika njendeka.

⁵ Yove wanjizengeleka ku mitambela yoshe, co lalo ukanjinyungu na nzili yove.

⁶ Mana ove ali yange anapu akulova, kunjasa kuwazivisisa.

⁷ Kulijo kunjikaila kutunda ku munzinzime wove? Kulijo kunjikatewela kutunda ku mesho ove?

⁸ Nga njilonda mwilu nove muuli, nga njilala mu vukalo vwa vatsi, nove muuli.

⁹ Nameme nga njapululwile mu ngangela, nambe kukala kulyala mu kangombe ka yambi.

¹⁰ Nameme ngoco, yove anga kuuli, ukanjitwamenena nakunjikwasa.

¹¹ Njasa kwihula lisusulungu ngeci linjishweke, nambe ceke cije cinanjizengeleka ngeci cilimuke vutsiki,

¹² oloni nameme lisusulungu kulyapwile vutsiki kuli yove embwe, na vutsiki lalo vwatwa ceke ngwe litangwa, lisusulungu na ceke vyafwa mumolika kuli yove.

¹³ Yove watangele vilyo vyange vyoshe, yove wanjimungile mwimo lya vanana.

¹⁴ Njikukandelela omwo yove wapwa wakukomokesa, vyoshe viwukalingi vyapwa vyavivwa, co lalo vikomokesa, njinazivuka mwamuvwa na mbunge yange yoshe.

¹⁵ Omo vatangele vitsiya vyange, nakuvyaka amo mwamuvwa mwimo lya vanana, omo njakolele muje mu vushweke, yove wanjimwene.

¹⁶ Yove wanjimwene simbu kanda njisemuke, matangwa oshe akuyoya kwange, vaasonekele mu livulu lyove, omo te kanda vacishangumuke kuwatanga.

¹⁷ Viyongola vyove yove Njambi, vyapwa vya seo kuli yange, wai asa kuvilava!

¹⁸ Nga njivilava vinapu vyavingi kutuvakana lishen̄avu. Omo njiinduka, anga njili amo nove.

¹⁹ Tsiya vaka-vuvi yove Njambi! Tundeni kuli yange yeni vaka-vuvi.

²⁰ Vaka-vuvi vakendeka vyuma vyavivi ali yove, nakwendeka lalo vyuma vyavivi a lizina lyove.

²¹ Yove Shukulu Kalunga, yange njazinda vaje vakuzinda! Njikayeluwisa lalo vaje vaka-kukutengulukila!

²² Yange njavazinda manene, njavapwisa vene vitozi vange.

²³ Njiilule ngeci uzivuke mbunge yange yove Njambi, njeseke, ngeci uwane viyongola vyange.

²⁴ Kenga muli yange nga muli cuma cimo cacivi, co njitwamenene mu ngila ije ya ku myaka yoshe.