Myaso 135 - Livulu lya Shukulu Kalunga

Mwaso wakulemesa

¹ Shangazaleni Shukulu Kalunga! Yeni vangamba va Shukulu Kalunga, shangazaleni lizina lyendi,

² yeni vaka-kwimana mu Njuvo ya Shukulu Kalunga Njambi yetu.

³ Shangazaleni Shukulu Kalunga, omwo ikeye wapwa wamuvwa, imbeni nakushangazala lizina lyendi, omwo ikeye wakala na mema ku mbunge.

⁴ Omwo Shukulu Kalunga waangwile Yakomba, kupwa wendi, waangwile lalo vanu va Isalele kupwa vufuko vwendi.

⁵ Njazivuka ngwange Shukulu Kalunga ikeye wapwa wakama, wapwa wakama kuhyana vinjambi voshe.

⁶ Shukulu Kalunga akalingi vyoshe vije ashaka mwilu na ano asi, mu mema a kalunga na mu vinzinga vyoshe.

⁷ Ikeye akasholola mashelwa kutunda ku shongo ya kaye, akatumu muhyato amo na nyonzi, co atuhwisa lalo lihunzi muje mulyakala.

⁸ Ikeye watsiile vana va vanalume va va ntwatwa mu Ingito, va ntwatwa va vanu na ava va tusitu.

⁹ Ikeye walingile vikomokeso na vizivukiso, mukuhisa mwene wa Ingito na vamyata vendi voshe.

¹⁰ Shukulu Kalunga wanyongesele miyati yaingi, co watsiile vimyene va nzili,

¹¹ Sihone, mwene wa vaAmoli, na Onge, mwene wa ku Mbashane, na vimyene voshe va mu Kanana.

¹² Co waanene lifuti lyavo kuli vanu vendi va Isalele kupwa vushwana.

¹³ Shukulu Kalunga, simbu yoshe vakakutumbula ngwavo u Njambi, lizina lyove vakalyanuka ku visemwa vyoshe.

¹⁴ Shukulu Kalunga akamena vanu vendi, nakuzivila ngozi vangamba vendi.

¹⁵ Tumponya va miyati yeka vanapu vakupanga na siliva na ngolinde, vanapu vakumunga na mavoko a vanu.

¹⁶ Vali na tunwa, oloni kuvasa kwendeka, vali na mesho, oloni kuvasa kumona.

¹⁷ Vali na matwi, oloni kuvasa kuziva, kuvasa nameme kuhwima.

¹⁸ Voshe vaje vapangele ava tumponya nakukulaela kuli vakevo, vapwe ngwe ava tumponya vavanapanga!

¹⁹ Vanu va Isalele shangazaleni Shukulu Kalunga, yeni vaka-kukombelela va Njambi mushangazaleni.

²⁰ Yeni vaLevi shangazaleni Shukulu Kalunga, mushangazaleni yeni voshe vaka-kukomoka Shukulu Kalunga.

²¹ Shangazaleni Shukulu Kalunga mu Siyone na mu Yelusalema mwimbo lyendi. Shangazaleni Shukulu Kalunga!