Myaso 132 - Livulu lya Shukulu Kalunga

Kushangazala Njuvo ya Shukulu Kalunga

Mwaso wakulamata nawo

¹ Shukulu Kalunga, anuka Ndaviti na tuyando twendi twoshe.

² Shukulu Kalunga anuka vije vyakulaesele Ndaviti, cisingo cije calisingile nove, Njambi ya Yakomba Muka-nzili yoshe omwo ikeye Ndaviti wendekele ngwendi,

³ “Kunjikakovela mu njuvo yange nambe kulala.

⁴ Kunjikahwimi nambe kulala tulo,

⁵ kuvanga noo njinawanena mwela Shukulu Kalunga, limbo lya Njambi ya Yakomba Muka-nzili yoshe.”

⁶ Twazivile vya Cikasa ca Cikumiiyo ku Mbetelehema, co twakaciwanene mu mahya a vaka-Njelime.

⁷ Twendekele ngwetu, “Tuyeni ku Njuvo ya Shukulu Kalunga, tulemeseni ku mesho endi!”

⁸ Ija ku Njuvo yove, Shukulu Kalunga, ija amo na Cikasa ca Cikumiiyo cimweso ca nzili yove.

⁹ Vaka-kukombelela vove simbu yoshe valinge mwa vushunga, vaka-kujela vove vaimbe nakujolela!

¹⁰ Shukulu Kalunga, Ndaviti napu munu wove wakwangula, kesi umuvyane embwe.

¹¹ Yove wakulaesele Ndaviti, cikulaeso cije kuukevala ngwove,

¹² “Nga vana vove vakanyunga cikumiiyo cange, na vizilika vije vinjivalongesa, co vakashwana a litanda lyove ku myaka yoshe.”

¹³ Shukulu Kalunga naangula Siyone kupwa limbo lyendi.

¹⁴ “Omu mukemwo munjikakala myaka yoshe, omu mukemwo munjishaka kushwana.

¹⁵ Njikana Siyone vyoshe vije vyanajeneka, co njikalisa vyakulya tuutu twamwo.

¹⁶ Njikavezikisa vaka-kukombelela vamwo, mu vyoshe vivakalinga, co vanu vamwo vakaimba nakutambeka nakuvwaelela.

¹⁷ Njikapwisa umo wa vatekulwila va Ndaviti kupwa mwene wa nzili vumwene vwendi vukakalako, ngwe ndeya ije ishukuma myaka yoshe.

¹⁸ Njikazivisa vitozi vendi shwamwa, oloni cilongo cendi cikavyazima.”