Myaso 119 - Livulu lya Shukulu KalungaLishiko lya Shukulu Kalunga 1 Vanavezika vanu vaje vayoya mu vushunga, vanu vaje vononoka lishiko lya Shukulu Kalunga. 2 Vanavezika vanu vaje vanyunga vizilika vya Shukulu Kalunga, nakumwononoka na vimbunge vyavo vyoshe. 3 Vanu vaje kuvesi kulinga mwamuvi, oloni vayoya mukwononoka Shukulu Kalunga. 4 Yove unatwana mashiko ove Shukulu Kalunga, ngeci tuwononoke mwamuvwa. 5 Yange kunjishaka kuseza vilongesa vyove! 6 Nga njitolilila mwamuvwa ku mashiko ove oshe, co kunjikalingi cuma cimo ca shwamwa. 7 Njikakushangazala na mbunge ya kulongwa, omo njililongesa mashiko ove akushungama. 8 Njikononoka vilongesa vyove Shukulu Kalunga, co kesi unjiseze. Kwononoka ku Mashiko a Shukulu Kalunga 9 Mukwenje asa kuyoya vatijo yoyesi yakujela? Mukwononoka mashiko ove Shukulu Kalunga. 10 Njikulemesa na mbunge yange yoshe, kesi unjitave kuseza mashiko ove. 11 Mashiko ove njinaanyungu mu mbunge yange, ngeci kesi njivulumune kuli yove. 12 Shukulu Kalunga njikushangazala, njilongese mashiko ove. 13 Njikelukilamo kwendeka mashiko oshe, aje awunanjana yove Shukulu Kalunga. 14 Njijolela akwononoka vilongesa vyove ngwe muje mwakajolela munu a vufuko vwendi vwavungi. 15 Njililongesa mashiko ove, co njiilula vilongesa vyove. 16 Njivwaelela mu vilongesa vyove, co kunjikevala lijwi lyove. Kuvwaelela mu Mashiko a Shukulu Kalunga 17 Linga mwamuvwa kuli yange ngamba yove, ngeci njiyoye nakwononoka vilongesa vyove. 18 Tonesa mesho ange, ngeci njimone vyuma vyakukomokesa vije vili mu mashiko ove. 19 Yange nji mungenzi ano asi, co kesi unjishwekele mashiko ove. 20 Mbunge yange inazeye, omwo kushungwiya mashiko ove simbu yoshe. 21 Yove ukendekela vanu vaka-kulyalesa, vanasingiwa vaje kuvononoka mashiko ove. 22 Kesi uvatave ngeci vanjishaule nakunjiyengula, omwo njinanyungu mashiko ove. 23 Nameme vaka-kushwana vanjikela munga nakunjifweya, oloni yange ngamba yove, njikalilongesa vizilika vyove. 24 Mashiko ove anjivwaelelesa, akewo akakunjinangula. Kulikuta mukwononoka Mashiko a Shukulu Kalunga 25 Yange njishaka kutsa, njiindule, ngwe muje wanjikulaesele! 26 Njalitavelele vyoshe vije njalingile, co yove wanjikumbulwile, njilongese mashiko ove! 27 Njikwase kuzivuka mashiko ove, co njikayongola a vipangi vyove vyakukomokesa. 28 Mbunge yange inazeye na vusiwa, njitakamese ngwe muje wanjikulaesele. 29 Njinyunge ku vingila vya makuli, mu ngozi yove, njilongese mashiko ove. 30 Njinaangula ngila ya vushunga, njinaka mbunge yange ku mashiko ove. 31 Njinakakateya ku vizilika vyove yove Shukulu Kalunga, kesi utave njizive shwamwa! 32 Njikakakateya kwononoka mashiko ove, omwo yove unanjana kuzivisisa mwamuvwa. Lilombelo lyakuzivisisa 33 Shukulu Kalunga njilongese kukavangeya mashiko ove, co njikaanyunga simbu yoshe. 34 Njane mana ngeci njinyunge mashiko ove, co njikawononoka na mbunge yange yoshe. 35 Njitwamenene mu ngila ya mashiko ove, omwo muli akewo njilinakuvwaelela. 36 Tengulwila mbunge yange mukwononoka ku mashiko ove, co kesi itengulukile ku cipululu embwe. 37 Tengulwila mesho ange kweka, ngeci kesi njimone vyuma vyangoco, pwa wamuvwa kuli yange ngwe muje wanjikulaesele. 38 Kolesa cikulaeso cove kuli yange ngamba yove, cikulaeso cije ukalingi kuli vaje vakukomoka. 39 Tundisa kayengu aka kanjizivisa lyova, omwo mashiko ove apwa amavwa. 40 Njishaka kwononoka mashiko ove, njane mwonyo wauha, omwo yove wapwa u muka-vushunga. Kukulaela Lishiko lya Shukulu Kalunga 41 Yove Shukulu Kalunga njimwese cizemo cove cije kucesi kutenguluka, co njamene, ngwe ku cikulaeso cove. 42 Asinoni njikakumbulula vaje vanjishaula, omwo njakulaela mu lijwi lyove. 43 Njasese kwendeka vushunga simbu yoshe, omwo cinyangavili cange, cili mu mashiko ove. 44 Njikononoka mashiko ove simbu yoshe, ku myaka yoshe! 45 Njikayoya mukupatuka, omwo njinononoka vilongesa vyove. 46 Njikambulula mashiko ove ku vimyene, co kunjikazivi shwamwa, 47 omwo njilinakuvwaelela a mashiko ove aje anjazema. 48 Njikononoka nakuzema mashiko ove, co njikayongola a vilongesa vyove. Kukulaela mu Lishiko lya Shukulu Kalunga 49 Anuka cikulaeso cove kuli yange ngamba yove, cikeco cinanjana cinyangavili. 50 Njiwana kuzembeleka nameme njili mu tuyando, omwo cikulaeso cove canjanene mwonyo. 51 Simbu yoshe vaka-kulyalesa vanjishendumuna, oloni kunjasezele mashiko ove. 52 Shukulu Kalunga omo njanuka mashiko ove a ku san̄ulu, co njiwana kuzembeleka. 53 Njikaluvala manene omo njimona vaka-vuvi kuvononoka mashiko ove, 54 kwoshe-ikwoshe kuje kunjili, vizilika vyove vinapu myaso yange, 55 Ku vutsiki njikakuyongola Shukulu Kalunga co njikononoka lishiko lyove. 56 Yove unanjivezikisa, omwo njinononoka vilongesa vyove. Kulikundika ku Lishiko lya Shukulu Kalunga 57 Shukulu Kalunga yove lika injishaka, njikulaesa kwononoka mashiko ove. 58 Njikulomba na mbunge yange yoshe, ukale na mema ku mbunge ali yange, ngwe muje wanjikulaesele! 59 Njayongola yoyesi yange, co njikulaesa kunyunga mashiko ove. 60 Njizambula vwasi-vwasi mukwononoka mashiko ove. 61 Nameme vaka-vuvi vanjitela myeto, oloni yange kunjivala mashiko ove. 62 Akati ka vutsiki njiinduka nakukushangazala, omwo mashiko ove apwa a vushunga. 63 Yange nji musamba wa vaje voshe vaka-kukukomoka, na musamba wa voshe vaje vononoka mashiko ove. 64 Asi anashulu na cizemo cove cije kucesi kutenguluka, Njilongese mashiko ove Shukulu Kalunga. Seo ya Lishiko lya Shukulu Kalunga 65 Unanyungu cikulaeso cove Shukulu Kalunga, unalingi mwamuvwa kuli yange ngamba yove. 66 Njilongese mana nakuzivisisa omwo njakulaela mu mashiko ove. 67 Omo te kanda unjihise, njakele nakulilingila, oloni ololo njilinakwononoka lijwi lyove. 68 Yove uwamuvwa, co lalo ukalingi vyavivwa, njilongese mashiko ove! 69 Vaka-kulyalesa vendeka makuli ali yange, oloni yange njikononoka vilongesa vyove, na mbunge yange yoshe. 70 Vaka-kulyalesa kuvesi na mana akuzivisisa, oloni yange njikavwaelela mu mashiko ove. 71 Capwile cacivwa kuli yange kunjihisa, ngeci njililongese mashiko ove. 72 Lishiko lyakutunda mu kanwa kove lyalivwa manene kuli yange, kutuvakana vufuko vwoshe vwa ano asi. Vushunga vwa Lishiko lya Shukulu Kalunga 73 Yove wanjitangele, njane mana ngeci njililongese mashiko ove. 74 Vaje vakukomoka vakavwaelela omo vakanjimona, omwo njinaka cinyangavili cange mu lijwi lyove. 75 Njazivuka ngeci mashiko ove apwa a vushunga yove Shukulu Kalunga, yove wapwa wa kulongwa ngeci wanjihisile. 76 Tava cizemo cove cije kucesi kutenguluka cinjizembeleke, ngwe ku cikulaeso cove kuli yange ngamba yove. 77 Njizivileko mema ku mbunge ngeci njiyoye, omwo njivwaelela mukwononoka mashiko ove. 78 Vaka-kulyalesa vazive shwamwa omwo akunjivangeya vya makuli, oloni yange njikayongola a vilongesa vyove. 79 Vaje vakukomoka vaije kuli yange, ngeci vazivuke vukaleo vwove. 80 Mbunge yange ipwe ya vushunga ku mashiko ove, ngeci kesi njizive shwamwa. Lilombelo lyakwamena 81 Mbunge yange inazeye yove Shukulu Kalunga, njilinakuvandamena yove ngeci unjamene, njakulaela mu lijwi lyove. 82 Mesho ange anonwa kukengelela cikulaeso cove, co njendeka ngwange, “Simbu mukajo ukanjizembeleka?” 83 Yange kunjesi na seo, oloni nameme ngoco, kunjevalele mashiko ove. 84 Visimbu vingaijo njikavandamena? Simbu mukajo ukahisa vaje valinakunjiyandesa? 85 Vaka-kulyalesa vaje kuvesi kwononoka mashiko ove, vananjiindila vimbulu ngeci njitsemo. 86 Mashiko ove oshe anapu a vushunga, njikwase Shukulu Kalunga, vanu vaka-makuli valinakunjipesa. 87 Vanesi kunjitsiya, oloni yange kunjavyanene mashiko ove. 88 Njamene ku kutsa ngwe ku cizemo cove cije kucesi kutenguluka, co njikononoka vizilika vyove. Kukulaela ku Lishiko lya Shukulu Kalunga 89 Lijwi lyove likakala ku myaka yoshe yove Shukulu Kalunga, likelyo lyakola mbe mwilu ya melu. 90 Kulongwa kwove kwakala ku visemwa vyoshe, yove unakolesa kaye, co kakakala ku myaka yoshe. 91 Mashiko ove aliko na lelo lino, omwo vyuma vyoshe vikupangela. 92 Nga kunjawanene kuvwaelela mu mashiko ove, nga njatsile mu simbu ya tuyando twange. 93 Kunjikevala mashiko ove embwe, omwo yove unanjana mwonyo akuwakavangeya. 94 Yange njapwa nji munu wove, omwo njinanyungu mashiko ove, unapande kunjamena. 95 Vaka-vuvi vananjivandamena ngeci vanjinyongese, oloni yange njikayongola mashiko ove. 96 Njinamono ngeci vyuma vyoshe vili naa avyahwila, oloni mashiko ove kuwesi naa awahwila. Cizemo ku Lishiko lya Shukulu Kalunga 97 Yange njazema manene mashiko ove! Co njikawayongola litangwa lyoshe. 98 Mashiko ove anjipwisa muka-mana kutuvakana vitozi vange, omwo simbu yoshe njilinawo. 99 Omwo njiyongola a mashiko ove, njili na mana manene kutuvakana valongisi vange voshe. 100 Omwo njapwa muka-kwononoka mashiko ove, njili na mana manene kutuvakana vaje vanayoyo myaka yaingi. 101 Yange njinatundu mu vingila vyoshe vya vuvi, ngeci njononoke lijwi lyove. 102 Yange kunjasezele mashiko ove, omwo yove unanjilongesawo. 103 Majwi ove apwelelela mu kanwa kange, apwelelela manene kutuvakana ngenga ya vuki! 104 Mashiko ove anjipwise muka-kuzivisisa, ngeci njizinde vyuma vyoshe vyavivi. Ceke cakutunda ku Lishiko lya Shukulu Kalunga 105 Lijwi lyove likelyo ndeya ku myanja yange, na ceke mu ngila yange. 106 Njinalisingi cisingo nakucikolesa, ngeci njikakavangeya mashiko ove a vushunga. 107 Njinayanda manene, nyunga mwonyo wange Shukulu Kalunga ngwe muje muwanjikulaesele. 108 Tambula lilombelo lyange lyakukandelela yove Shukulu Kalunga, nakunjilongesa mashiko ove. 109 Nameme mwonyo wange uli mu vushonde simbu yoshe, oloni kunjevalele mashiko ove. 110 Vaka-vuvi vananjitela mweto, oloni yange kunjasezele mashiko ove. 111 Mashiko ove apwa vushwana vwange ku myaka yoshe, akewo anapu kuvwaelela kwa mbunge yange. 112 Njinayongola kwononoka mashiko ove, noo njikatsa. Kukala mwamuvwa ku Lishiko lya Shukulu Kalunga 113 Njazinda vanu vaje vaka-kujeneka kulongwa kuli yove, oloni yange njazema mashiko ove. 114 Yove wapwa u ntelo yange na cimpaka cange, cinyangavili cange cakala mu lijwi lyove. 115 Tundeni kuli yange yeni vaka-kulinga vuvi, ngeci njinyunge mashiko a Njambi yange. 116 Njitakamese ngwe muje muwanjikulaesele, ngeci njiyoye, kesi uzimangane cinyangavili cange embwe! 117 Njinyunge mwamuvwa, ngeci njovoke, co simbu yoshe njikasingimika mashiko ove. 118 Yove uvyana voshe vaje vajeneka kwononoka mashiko ove, matumbe avo apwa a makuli. 119 Ukombila kuti vaka-vuvi voshe ngwe vyuma vya mazilo, oloni yange njazema mashiko ove. 120 Njijaja manene omo njikuyongola, njili na lyova lya kusompa kwove. Kwononoka ku Lishiko lya Shukulu Kalunga 121 Njinalingi vyuma vya vushunga na vyuma vyavivwa, kesi unjecelele ku vitozi vange! 122 Njinyunge mwamuvwa yange ngamba yove, co kesi wecelele vaka-vuvi vanjiyandese! 123 Mesho ange anajuka mukukengelela kwamena kwove, ngwe muje muwanjikulaesele. 124 Njimwese cizemo cove cije kucesi kutenguluka, co njilongese mashiko ove. 125 Yange nji ngamba yove, njane mana, ngeci njizivuke vilongesa vyove. 126 Simbu yove yakupanga inete Shukulu Kalunga, omwo vanu kuvesi nakwononoka mashiko ove. 127 Yange njazema mashiko ove kutuvakana ngolinde, kutuvakana ngolinde yaivwa. 128 Njikakava vilongesa vyove vyoshe, oloni njazinda vingila vyoshe vya kupenga-penga. Kushaka kwononoka Lishiko lya Shukulu Kalunga 129 Vilongesa vyove vyapwa vyakukomokesa, njilinakuvyononoka na mbunge yange yoshe. 130 Kununguluka kwa vilongesa vyove kwana ceke, kwana mana kuli vaje kuvazivuka. 131 Njishungwiya manene-nene mashiko ove oshe. 132 Njanuke nakunjizivilako mema ku mbunge, ngwe muje muukalingi na voshe vaje vakuzema. 133 Njinyunge ngwe muje muwanjikulaesele, kesi utave njiwe, co lalo kesi utave vuvi vunjifungulule. 134 Njamene kuli vanu vaje valinakunjiyandesa, ngeci njononoke mashiko ove. 135 Kenga ali yange na ngozi, co njilongese mashiko ove. 136 Mesho ange ali na misozi manene, omwo vanu kuvesi nakwononoka lishiko lyove. Vushunga vwa Lishiko lya Shukulu Kalunga 137 Yove wapwa u muka-vushunga Shukulu Kalunga, na mashiko ove lalo apwa a vushunga. 138 Vilongesa vije unaana vinapu vya vushunga, co lalo vinapu vyavivwa. 139 Vukalu vwange vwakama manene, omwo vitozi vange vavyana majwi ove. 140 Mwa vushunga vene vikulaeso vyove, vanavyeseka mwamuvwa, ngecivene, yange ngamba yove njivizema. 141 Nameme kunjesi na vulemu, oloni kunjevalele mashiko ove. 142 Kushungama kwove kwapwa kwa myaka yoshe, na mashiko ove simbu yoshe apwa a vushunga. 143 Kayando na vusiwa vwakama vili ali yange, oloni mashiko ove alinakunjivwaelelesa. 144 Vizilika vyove vyapwa vya vushunga ku myaka yoshe, njane mana akuvizivuka ngeci njiyoye. Lilombelo lyakwamena 145 Njilombela kuli yove na mbunge yange yoshe, njikumbulule Shukulu Kalunga, co njikononoka mashiko ove. 146 Njikulambelela ngeci unjovole, co njikanyunga mashiko ove. 147 Omo litangwa kanda lituuke, njilombela kuli yove ngeci unjikwase, njinaka cinyangavili cange mu majwi ove. 148 Kunjesi kulala tulo vutsiki vwoshe, njikayongola lika vikulaeso vyove. 149 Tolilila ku lijwi lyange Shukulu Kalunga ngwe ku cizemo cove cije kucesi kutenguluka, kumbulula lilombelo lyange, co njamene! 150 Vaje vaka-kunjiyandesa, vanu vaje kuvesi kunyunga mashiko ove, vanatumbu matumbe amavi akunjivulumuna, 151 oloni yove Shukulu Kalunga uli kuyehi nange, co mashiko ove oshe apwa a vushunga. 152 Ku san̄ulu njalilongesele mashiko ove, njawanene ngeci akewo waapwisile ngeci akaleko myaka yoshe. Lilombelo lyakukwasa 153 Kenga a n̄avava yange, co njovole, omwo yange kunjevalele mashiko ove. 154 Njakwile ku mulonga wange nakunjipatula, njovole ngwe ku cikulaeso cove! 155 Vaka-vuvi kuvawana kwamena, omwo kuvesi kwononoka mashiko ove. 156 Kutetela kwove kwapwa kwakama Shukulu Kalunga, njovole, ngwe ku vushunga vwove. 157 Vitozi vavangi valinakunjiyandesa, oloni yange kunjasezele mashiko ove. 158 Omo njikenga ali vaka-vungungu, njiziva kuviya manene mu mbunge, omwo kuvesi kunyunga mashiko ove. 159 Shukulu Kalunga, anuka muje munjazema vilongesa vyove, njovole ngwe ku cizemo cove cije kucesi kutenguluka. 160 Majwi ove oshe apwa a vushunga, mashiko ove oshe apwa a vushunga ku myaka yoshe. Kulikundika ku Lishiko lya Shukulu Kalunga 161 Vimyene vanjiyandesa kwakujeneka mulonga, oloni yange njikasingimika lishiko lyove na mbunge yange yoshe. 162 Njivwaelela a lijwi lyove, ngwe kuvwaelela kwa munu uje nawana vufuko vwavungi. 163 Njazinda makuli, oloni njazema mashiko ove. 164 Njikakushangazala visimbu vitanu na vivali a litangwa na litangwa, omwo mashiko ove apwa a vushunga. 165 Vaje voshe vazema mashiko ove vali mu kwoloka, co kukwesi cuma cimo casa kuvatanukisa. 166 Njinavandamena kwamena kwove Shukulu Kalunga, co njikanyunga mashiko ove. 167 Njizema nakwononoka mashiko ove, na mbunge yange yoshe. 168 Njononoka mashiko ove na vizilika vyove, omwo yove uzivuka vyoshe vije vinjikalingi. Lilombelo lyakukwasa 169 Lilombelo lyange lyete kuli yove Shukulu Kalunga, njane mana akutunda ku lijwi lyove. 170 Tolilila kulomba kwange, co njamene, ngwe ku lijwi lyove! 171 Njikakushangazala simbu yoshe omwo ukanjilongesa mashiko ove. 172 Njikaimba vya mashiko ove, omwo mashiko ove apwa a vushunga. 173 Upwe u muka-kunjikwasa simbu yoshe, omwo njikakava mashiko ove. 174 Njikuvandamena ngeci unjamene Shukulu Kalunga, mashiko ove anjivwaelelesa. 175 Tava njiyoye, ngeci njikushangazale, co vilongesa vyove vinjikwase! 176 Njiyevangela ngwe manga wakuzimbala, njishakezeke yange ngamba yove, omwo kunjevalele mashiko ove. |
The Bible in Mbunda ©The Bible Society of Zambia, 2006
Bible Society of Zambia