Myaso 118 - Livulu lya Shukulu Kalunga

Lilombelo lyakukandelela akuhyana

¹ Kandeleleni kuli Shukulu Kalunga, omwo ikeye wapwa wamuvwa, na cizemo cendi cije kucesi kutenguluka, cakala ku myaka yoshe.

² Isalele vendeke ngwavo, “Cizemo cendi cije kucesi kutenguluka, cakala ku myaka yoshe.”

³ Vaka-kukombelela va Njambi vendeke ngwavo, “Cizemo cendi cije kucesi kutenguluka cakala ku myaka yoshe.”

⁴ Vaje voshe vaka-kukomoka Shukulu Kalunga vendeke ngwavo, “Cizemo cendi cije kucesi kutenguluka, cakala ku myaka yoshe.”

⁵ Omo njakele mu tuyando, njatambekele kuli Shukulu Kalunga, co wanjikumbulwile nakunjipatula.

⁶ Shukulu Kalunga ali amo nange, kunjizivi lyova, munu asa kunjilinga vikajo?

⁷ Shukulu Kalunga ali amo nange mukunjikwasa, co njikafungulula vitozi vange.

⁸ Cinapu cuma cacivwa kutewela kuli Shukulu Kalunga, kutuvakana kukulaela munu.

⁹ Cinapu cuma cacivwa kutewela kuli Shukulu Kalunga, kutuvakana kukulaela vantwama va ano asi.

¹⁰ Miyati yoshe vanjizengelekele, oloni mu lizina lya Shukulu Kalunga njavanyongesele!

¹¹ Vanjizengelekele ku mitambela yoshe, oloni mu lizina lya Shukulu Kalunga njavanyongesele!

¹² Vanjizengelekele ngwe vimuka, oloni vwasi-vwasi vanyongele ngwe tuhya twenyeka mwila wakuma, mu lizina lya Shukulu Kalunga njavanyongesele.

¹³ Vanjilwisile manene kushaka kunjifungulula vene, oloni Shukulu Kalunga wanjikwasele.

¹⁴ Shukulu Kalunga ikeye muka-kunjikanyamesa, nakunjana nzili, ikeye napu muyoyesi wange!

¹⁵ Mitambi yakuhyana ilinakutundilila mu vimbalaka vya vanu va Njambi ngwavo, “Nzili yakama ya Shukulu Kalunga inacilingi!

¹⁶ Nzili yendi inatunenela kuhyana, nzili yendi inalingi vyuma vyakama mu nzita!”

¹⁷ Kunjikatsi embwe, oloni njikayoya, ngeci njambulule vije vyanalingi Shukulu Kalunga.

¹⁸ Shukulu Kalunga wanjinyanyamesele manene, oloni kanjecelele ngeci njitse embwe.

¹⁹ Shokololeni vikolo vya vushunga, ngeci njikovelemo nakukandelela kuli Shukulu Kalunga!

²⁰ Eci cikeco cikolo ca Shukulu Kalunga, kuvanga vaka-vushunga lika vakevo vakakovelamo!

²¹ Njikushangazala yove Shukulu Kalunga, omwo wakumbulwile malombelo ange, co unapu muyoyesi wange.

²² Limanya lije livavyanene vaka-kutunga, likelyo ololo linapu lya seo yakama kuli voshe.

²³ Eci cikeco calingile Shukulu Kalunga, co cinapu cakukomokesa kuli yetu!

²⁴ Eli likelyo litangwa lije Shukulu Kalunga nasholola nzili yendi, tuvwaeleleni nakujolela a litangwa eli!

²⁵ Yove Shukulu Kalunga twamene, yove Shukulu Kalunga tuvezikise.

²⁶ Njambi avezikise uje aija mu lizina lya Shukulu Kalunga! Tumivezikisa na vivezikiso vya mu Njuvo ya Shukulu Kalunga.

²⁷ Shukulu Kalunga ikeye Njambi yetu, ikeye natutwila ceke, shangumukeni ciwano oku munakwata minango ya maputa mu mavoko eni, co yeni nakuzenguluka mutula.

²⁸ Yove wapwa u Njambi yange, njikakukandelela, co njambulula vukama vwove.

²⁹ Kandeleleni kuli Shukulu Kalunga, omwo ikeye wapwa wamuvwa, na cizemo cendi cije kucesi kutenguluka, cakala ku myaka yoshe.