Myaso 116 - Livulu lya Shukulu Kalunga

Kushangazala kwa munu uje yanovola Njambi ku kutsa

¹ Njizema Shukulu Kalunga, omwo nazivi malombelo ange.

² Simbu yoshe ije njitambeka kuli ikeye, ikeye akanjitolilila.

³ Vutsi vwanjizengelekele ngwe mikole, na mishongo ya vukalo vwa vatsi yanjiwanene, co njakele mu tuyando na vusiwa.

⁴ Asinoni njatambekele kuli Shukulu Kalunga ngwange, “Yove Shukulu Kalunga, njilinakukulomba ngwange amena mwonyo wange!”

⁵ Shukulu Kalunga wapwa muka-ngozi na muka-vushunga, eyo, Njambi yetu wakala na mema ku mbunge.

⁶ Shukulu Kalunga akanyungu vaje voshe vanazeye, omo njakele mu vushonde, ikeye wanjamenene.

⁷ Mbunge yange simpa, omwo Shukulu Kalunga napu wamuvwa kuli yange.

⁸ Shukulu Kalunga nanjamena ku kutsa, ikeye nanjisikumuna misozi, nakutakamesa mendi ange ngeci kesi njitalyangele.

⁹ Ngecivene, njilinakwenda amo na Shukulu Kalunga, mu lifuti lya vaka-kuyoya.

¹⁰ Njakulaelele vene, nameme njendekele ngwange, “Mwa vushunga vananjitsene.”

¹¹ Nameme omo njakele na lyova, njendekele ngwange, “Naumo wai njasa kukulaela.”

¹² Cuma mukajo cinjikana kuli Shukulu Kalunga, omwo avivezikiso vyendi vyoshe kuli yange?

¹³ Njikanenela Shukulu Kalunga n̄ombelo ya vinyu, mukukandelela omwo nanjamena.

¹⁴ Mu cikungulukilo ca vanu vendi voshe, njikamwana vije njamukulaesele.

¹⁵ Kutsa kwa vaka-kukulaela, kuli na seo ku mesho a Shukulu Kalunga.

¹⁶ Yove Shukulu Kalunga mwa vushunga yange nji ngamba yove, njikakupangela ngwe muje muvalingile vene vanana. Unanjipatula ku malyenge a kutsa.

¹⁷ Njikakukombelela n̄ombelo ya cikandelela, nakulombela mu lizina lyove.

¹⁸ Mu cikungulukilo ca vanu vove voshe,

¹⁹ mu cipango ca Njuvo yove mu Yelusalema, njikakwana vije njakukulaesele. Shangazaleni Shukulu Kalunga!