Myaso 115 - Livulu lya Shukulu Kalunga

Njambi lika ikeye muka-vushunga

¹ Kuli yove lika Shukulu Kalunga, kuli yove lika, kesi kuli yetu, vanapande kwana vumpau, omwo cizemo cove cije kucesi kutenguluka, na kulongwa kwove.

² Omwo vikajo vanu vatwihula ngwavo, “Njambi yeni ali kulijo?”

³ Njambi yetu ali mwilu, akalingi vyoshe vije ashaka.

⁴ Tumponya va miyati yeka vanapu vakupanga na siliva na ngolinde, vanapu vakumunga na mavoko a vanu.

⁵ Vali na tunwa, oloni kuvasa kwendeka, vali na mesho, oloni kuvasa kumona.

⁶ Vali na matwi, oloni kuvasa kuziva, vali na majulu, oloni kuvasa kuziva kunika.

⁷ Vali na mavoko, oloni kuvasa kukwata, vali na mendi, oloni kuvasa kwenda, co lalo kuvasa kutuula lijwi.

⁸ Voshe vaje vapangele ava tumponya nakukulaela kuli vakevo, vapwe ngwe ava tumponya vavanapanga!

⁹ Vanu va Isalele kulaeleni kuli Shukulu Kalunga, ikeye muka-kumikwasa na muka-kuminyunga.

¹⁰ Yeni vaka-kukombelela va Njambi, kulaeleni kuli Shukulu Kalunga, ikeye muka-kumikwasa na muka-kuminyunga.

¹¹ Yeni voshe vaka-kulemesa Shukulu Kalunga, kulaeleni kuli ikeye, ikeye muka-kumikwasa na muka-kuminyunga.

¹² Shukulu Kalunga akatwanuka nakutuvezikisa, akavezikisa vanu va Isalele, nakuvezikisa lalo voshe vaka-kukombelela va Njambi.

¹³ Shukulu Kalunga akavezikisa voshe vaje vamulemesa, vakama nambe vavandondo.

¹⁴ Shukulu Kalunga amitumise manene, yeni na vatekulwila veni.

¹⁵ Shukulu Kalunga uje watangele lilu na asi amivezikise.

¹⁶ Lilu lya melu lyapwa lya Shukulu Kalunga, oloni kaye wakaanene ku vanu.

¹⁷ Vatsi kuvasa kushangazala Shukulu Kalunga, nambe woshe uje aya mu vukalo vwa vatsi, kasa kushangazala Shukulu Kalunga.

¹⁸ Oloni yetu tulinakuyoya, tushangazaleni Shukulu Kalunga, ku simbu ino na ku myaka yoshe. Shangazaleni Shukulu Kalunga!